എനർജി ഡ്രിങ്കുകൾ കുടിച്ചതിനെ തുടർന്ന് ന്യൂ ബ്രൺസ്‌വിക്കിൽ 10 വയസ്സുകാരിയെ  ആശുപത്രിയിൽ പ്രവേശിപ്പിച്ചു

 

എനർജി ഡ്രിങ്കുകൾ കുടിച്ചതിനെ തുടർന്ന് ന്യൂ ബ്രൺസ്‌വിക്കിൽ 10 വയസ്സുകാരിയെ  ആശുപത്രിയിൽ പ്രവേശിപ്പിച്ചു. ഒരു പ്രാദേശിക റിക്രിയേഷൻ സെൻ്ററിൽ നടന്ന കൗമാരക്കാർക്കായുള്ള പരിപാടിക്കിടെയാണ് കുട്ടിക്ക് അപസ്മാരം (Seizure) ഉണ്ടായത്. കുഴഞ്ഞു വീണ കുട്ടിയെ ആംബുലൻസിൽ ആശുപത്രിയിൽ എത്തിക്കുകയായിരുന്നു. അടുത്തുള്ള കടയിൽ നിന്ന് ഈ പാനീയങ്ങൾ എളുപ്പത്തിൽ വാങ്ങാൻ സാധിച്ചുവെന്ന് കുട്ടിയുടെ അമ്മ പറയുന്നു. ഈ സംഭവത്തെ തുടർന്ന്, പ്രായപൂർത്തിയാകാത്തവർക്ക് എനർജി ഡ്രിങ്കുകൾ വിൽക്കുന്നത് നിരോധിക്കണം എന്ന ആവശ്യം ശക്തമായിരിക്കുകയാണ്.

എനർജി ഡ്രിങ്കുകളിൽ ഉയർന്ന അളവിൽ കഫീനും മറ്റ് ഉത്തേജകങ്ങളും അടങ്ങിയിട്ടുണ്ടെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഇത് കുട്ടികളിൽ അപസ്മാരം, ഹൃദയസംബന്ധമായ പ്രശ്നങ്ങൾ, ഉത്കണ്ഠ തുടങ്ങിയ ഗുരുതരമായ ആരോഗ്യപ്രശ്നങ്ങൾക്ക് കാരണമാകും. കുട്ടികൾ എനർജി ഡ്രിങ്കുകൾ കഴിക്കരുതെന്ന് ന്യൂ ബ്രൺസ്‌വിക്കിലെ ചീഫ് മെഡിക്കൽ ഓഫീസർ ഓഫ് ഹെൽത്ത് നേരത്തെ തന്നെ നിർദ്ദേശിച്ചിട്ടുണ്ട്.

കുട്ടികൾ എന്താണ് വാങ്ങുന്നതെന്നും കുടിക്കുന്നതെന്നും ശ്രദ്ധിക്കണമെന്ന് മാതാപിതാക്കളോട് ആരോഗ്യ വിദഗ്ധർ നിർദ്ദേശിച്ചു. ചെറുപ്പക്കാർക്ക് എനർജി ഡ്രിങ്കുകൾ വില്ക്കുന്നതിന് നിയന്ത്രണം ഏർപ്പെടുത്തിയിട്ടുള്ള മറ്റ് രാജ്യങ്ങളുടെ രീതി കാനഡയും പിന്തുടരണം എന്ന് ഇവർ പറയുന്നു. കടകളിൽ വിൽക്കുന്ന ഒരു പാനീയം കാരണം ഒരു കുട്ടിക്കും ഇത്തരമൊരു അപകടം ഉണ്ടാകരുത് എന്ന് കുട്ടിയുടെ അമ്മ പറയുന്നു. ഈ കേസ് നിയമനിർമ്മാതാക്കളെ വേഗത്തിൽ നടപടിയെടുക്കാൻ പ്രേരിപ്പിക്കുമെന്നും അവർ പ്രതീക്ഷ പ്രകടിപ്പിച്ചു.