FBI-യുടെ 'മോസ്റ്റ് വാണ്ടഡ്' ലിസ്റ്റിലുള്ള പ്രതിയും മുൻ കനേഡിയൻ ഒളിമ്പിക് താരവുമായ റയാൻ ജെയിംസ് വെഡ്ഡിങ്ങിൻ്റെ പുതിയ ചിത്രം പുറത്ത്

FBI-യുടെ 'മോസ്റ്റ് വാണ്ടഡ്' ലിസ്റ്റിലുള്ള പ്രതിയും മുൻ കനേഡിയൻ ഒളിമ്പിക് താരവുമായ റയാൻ ജെയിംസ് വെഡ്ഡിങ്ങിൻ്റെ പുതിയ ചിത്രം എഫ്.ബി.ഐ പുറത്തുവിട്ടു. 44 വയസ്സുള്ള വെഡ്ഡിംഗ്, എഫ്.ബി.ഐയുടെ ടെൻ മോസ്റ്റ് വാണ്ടഡ് പട്ടികയിൽ ഉൾപ്പെട്ട വ്യക്തിയാണ്. വൻകിട മയക്കുമരുന്ന് കടത്ത് ശൃംഖല നടത്തിയതിനാണ് ഇയാൾക്കെതിരെ കുറ്റം ചുമത്തിയിരിക്കുന്നത്. കൊളംബിയയിൽ നിന്ന് മെക്സിക്കോ വഴിയും യു.എസ്. വഴിയും കൊക്കെയ്ൻ കാനഡയിലേക്ക് കടത്തിയെന്നാണ് ആരോപണം.

തൻ്റെ ക്രിമിനൽ സാമ്രാജ്യം സംരക്ഷിക്കുന്നതിനായി ഇയാൾ കൊലപാതകങ്ങൾ നടത്തിയതായും ഉദ്യോഗസ്ഥർ പറയുന്നു. ഇയാളെക്കുറിച്ചുള്ള വിവരങ്ങൾ നൽകുന്നവർക്കുള്ള പാരിതോഷികം യു.എസ്. സർക്കാർ 15 മില്യൺ ഡോളറായി വർധിപ്പിച്ചു.2025-ലെ വേനൽക്കാലത്ത് മെക്സിക്കോയിൽ വെച്ച് എടുത്ത ചിത്രമാണ് ഇപ്പോൾ പുറത്ത് വിട്ടിട്ടുള്ളതെന്നാണ് കരുതപ്പെടുന്നത്.2002-ലെ വിൻ്റർ ഒളിമ്പിക്സിൽ കാനഡയെ പ്രതിനിധീകരിച്ച് സ്നോബോർഡിംഗ് മത്സരത്തിൽ പങ്കെടുത്ത വ്യക്തിയാണ് റയാൻ ജെയിംസ് വെഡ്ഡിംഗ് . ഇതിന് ശേഷം ഇയാൾ സംഘടിത കുറ്റകൃത്യങ്ങളിലേക്ക് തിരിഞ്ഞതായി അന്വേഷകർ പറയുന്നു. ഇയാളുടെ ശൃംഖല പ്രതിവർഷം 60 മെട്രിക് ടൺ കൊക്കെയ്ൻ കടത്തിയെന്നാണ് ആരോപണം. ഇതിൻ്റെ മൂല്യം ഒരു ബില്യൺ ഡോളറിലധികം വരും. സിനാലോവ കാർട്ടലിൻ്റെ സംരക്ഷണത്തിൽ ഇയാൾ മെക്സിക്കോയിൽ ഒളിച്ചു താമസിക്കുകയാണെന്നാണ് കരുതപ്പെടുന്നത്.ഇയാളെ പിടികൂടാൻ സഹായിക്കുന്ന വിവരങ്ങൾ പൊതുജനങ്ങൾ പങ്കുവയ്ക്കണമെന്ന് എഫ്.ബി.ഐയും കനേഡിയൻ പോലീസും ആവശ്യപ്പെട്ടു.