കാനഡയിൽ വിദേശ ഡോക്ടർമാർക്ക് സ്ഥിരതാമസത്തിനായി ഫാസ്റ്റ് ട്രാക്ക് സംവിധാനം,  5000 പേർക്ക് അവസരം

രാജ്യത്തെ ഡോക്ടർമാരുടെ കുറവ് പരിഹരിക്കുന്നതിനായി കാനഡയിൽ താൽക്കാലികമായി ജോലി ചെയ്യുന്ന വിദേശ ഡോക്ടർമാർക്ക്   PR നേടുന്നതിന് ഫാസ്റ്റ് ട്രാക്ക് സംവിധാനം തുറന്നു നൽകുന്നു. ഇമിഗ്രേഷൻ മന്ത്രി ലെന മെറ്റ്ലെഗ് ഡിയാബാണ് ഈ നയമാറ്റം പ്രഖ്യാപിച്ചത്. ഇതു വഴി നിലവിൽ കാനഡയിൽ ജോലി ചെയ്യുന്ന 5,000 ഡോക്ടർമാർക്ക് ഈ സൗകര്യം പ്രയോജനപ്പെടുത്താം.

നിലവിലെ ഇമിഗ്രേഷൻ ക്വാട്ടയ്ക്ക് പുറമെയാണ് ഈ 5,000 ഒഴിവുകൾ അനുവദിക്കുന്നത്. കഴിഞ്ഞ മൂന്ന് വർഷത്തിനിടെ കുറഞ്ഞത് ഒരു വർഷത്തെ കനേഡിയൻ തൊഴിൽ പരിചയമുള്ള ഡോക്ടർമാർക്ക്, 2026-ൽ ആരംഭിക്കുന്ന പുതിയ എക്സ്പ്രസ് എൻട്രി (Express Entry) വിഭാഗത്തിലൂടെ സ്ഥിരതാമസത്തിന് അപേക്ഷിക്കാം. ഈ പുതിയ നടപടികൾ പ്രകാരം, ജോലി വാഗ്ദാനം ലഭിച്ച ലൈസൻസുള്ള ഡോക്ടർമാരെ നോമിനേറ്റ് ചെയ്യാൻ പ്രവിശ്യകൾക്കും ടെറിട്ടറികൾക്കും കഴിയും. കൂടാതെ, ഈ പ്രോഗ്രാമിലേക്ക് നോമിനേറ്റ് ചെയ്യപ്പെടുന്ന ഡോക്ടർമാരുടെ വർക്ക് പെർമിറ്റ് അപേക്ഷകൾക്ക് 14 ദിവസത്തിനുള്ളിൽ അതിവേഗം അനുമതി നൽകുമെന്നും പ്രഖ്യാപനത്തിൽ പറയുന്നു. ആരോഗ്യസംരക്ഷണ മേഖലയിലെ വലിയ വിടവ് നികത്താനും, രാജ്യത്തെ ആരോഗ്യ സംവിധാനത്തിന് സ്ഥിരത ഉറപ്പാക്കാനും ഈ നീക്കം സഹായിക്കുമെന്നാണ് അധികൃതർ കരുതുന്നത്. പല ഡോക്ടർമാരും ഇതിനോടകം കാനഡയിൽ രോഗികളെ ചികിത്സിക്കുന്നുണ്ട്, അവരെ രാജ്യത്തിന് നഷ്ടപ്പെടാൻ കഴിയില്ലെന്നും മന്ത്രി ഡിയാബ് കൂട്ടിച്ചേർത്തു.