പ്രസവ വേദന എടുത്ത യുവതിയെ അവഗണിച്ചു; നോര്ത്ത് ടെക്സസ് ഹോസ്പിറ്റലിലെ നഴ്സിനെ പിരിച്ചുവിട്ടു
By: 600002 On: Dec 4, 2025, 11:38 AM
പി പി ചെറിയാന്
മെസ്ക്വിറ്റ്(ഡാളസ്): പ്രസവ വേദനയെടുത്ത് ബുദ്ധിമുട്ടിയ യുവതിക്ക് പരിചരണം നല്കാന് വൈകിയതിനെ തുടര്ന്ന് വിവാദത്തിലായ ട്രിയേജ് നഴ്സ് ഇനി ഡാലസ് റീജിയണല് മെഡിക്കല് സെന്ററില് ജോലി ചെയ്യുന്നില്ലെന്ന് ആശുപത്രി അധികൃതര് അറിയിച്ചു.
നവംബര് 10-ന് രാത്രി, കിയാര ജോണ്സ് എന്ന യുവതി കടുത്ത പ്രസവ വേദനയില് പുളയുമ്പോള്, നഴ്സ് അവരുടെ മെഡിക്കല് ഹിസ്റ്ററിയെക്കുറിച്ച് ചോദ്യങ്ങള് ചോദിക്കുകയും പ്രവേശന നടപടികള് വൈകിക്കുകയും ചെയ്യുന്നതിന്റെ വീഡിയോ വൈറലായിരുന്നു. വേദന തുടങ്ങി ആറ് മിനിറ്റിനുള്ളില് യുവതി പ്രസവിക്കുകയും ചെയ്തു.
സംഭവം വിവാദമായതിനെ തുടര്ന്ന് അവധിയില് പ്രവേശിപ്പിച്ചിരുന്ന നഴ്സിനെ ഇപ്പോള് സര്വ്വീസില് നിന്ന് നീക്കം ചെയ്തു എന്ന് ആശുപത്രി പ്രസ്താവനയില് അറിയിച്ചു.
'ജീവിതത്തെക്കാള് പ്രധാനം പേപ്പര് വര്ക്കുകള്' ആണെന്ന സമീപനമാണ് ആശുപത്രിയില് ഉണ്ടായതെന്ന് കിയാരയുടെ അമ്മ ആരോപിച്ചു.
സംഭവത്തെ ഗൗരവമായി കാണുന്നു എന്നും ജീവനക്കാര്ക്ക് സഹാനുഭൂതി, അനുകമ്പ എന്നിവയില് പരിശീലനം നല്കാന് നടപടി സ്വീകരിച്ചതായും ആശുപത്രി വ്യക്തമാക്കി. കിയാരയുടെ അഭിഭാഷകര് ആശുപത്രിയുടെ നടപടികളില് കൂടുതല് സുതാര്യത ആവശ്യപ്പെട്ടിട്ടുണ്ട്.