ചൈനീസ് ഡ്രോണുകൾക്ക് കാനഡയിൽ നിയന്ത്രണം

കാനഡയുടെ ഫെഡറൽ പോലീസ് സേനയായ റോയൽ കനേഡിയൻ മൗണ്ടഡ് പോലീസ് (RCMP),  ചൈനീസ് നിർമ്മിത ഡ്രോണുകളുടെ ഉപയോഗത്തിൽ നിയന്ത്രണങ്ങൾ ഏർപ്പെടുത്തി. ഏകദേശം 973 ചൈനീസ് ഡ്രോണുകളാണ് നിലവിൽ RCMP-യുടെ കൈവശമുള്ളത്, ഇത് അവരുടെ ആകെ ഡ്രോൺ ശേഖരത്തിൻ്റെ ഏകദേശം 80% വരും. സുരക്ഷ പ്രശ്നം, അപകടസാധ്യതകൾ എന്നിവ കൂടുതലായി ചൈനീസ് ഡ്രോണുകളിൽ ഉണ്ടെന്ന്  പോലീസ് സേന, സെനറ്റിലെ ദേശീയ സുരക്ഷാ സമിതിക്ക് നൽകിയ പ്രസ്താവനയിൽ പറയുന്നു. ഈ നിയന്ത്രണങ്ങൾ കാരണം, ഡ്രോണുകൾ  അപകടസാധ്യത കുറഞ്ഞ ഓപ്പറേഷനുകൾക്ക് (non-sensitive operations) മാത്രമേ ഇവ ഉപയോഗിക്കൂ.

കാണാതായവരെ കണ്ടെത്തുക, കാർ മോഷണം, കമ്മ്യൂണിറ്റി പോലീസ് സേവനങ്ങൾ തുടങ്ങിയ കാര്യങ്ങൾക്ക് മാത്രമായി ഈ ചൈനീസ് ഡ്രോണുകളെ ഇപ്പോൾ പരിമിതപ്പെടുത്തിയിരിക്കുകയാണ്. എന്നാൽ, Emergency Response Teams, വി.ഐ.പി.കളുടെ സംരക്ഷണം, അതിർത്തി സംരക്ഷണ ഓപ്പറേഷനുകൾ, യു.എസ്. അധികാരികളുമായുള്ള സംയുക്ത അന്വേഷണങ്ങൾ തുടങ്ങിയ അതീവ രഹസ്യ സ്വഭാവമുള്ള പ്രവർത്തനങ്ങൾക്കായി ഈ ഡ്രോണുകൾ ഉപയോഗിക്കില്ലെന്ന് RCMP അറിയിച്ചു. നിലവിൽ, ഈ പ്രധാനപ്പെട്ട ഓപ്പറേഷനുകൾക്കായി ഫ്രാൻസ്, യുഎസ്, ബെൽജിയം എന്നിവിടങ്ങളിൽ നിന്നുള്ള 232 ഡ്രോണുകളാണ് ഉപയോഗിക്കുന്നത്. ചൈനീസ് ഡ്രോണുകൾ മാറ്റിസ്ഥാപിക്കാൻ ഏകദേശം 30 ദശലക്ഷം കനേഡിയൻ ഡോളറിലധികം ചെലവ് വരുമെന്നും, ചൈനീസ് ഇതര ഡ്രോണുകൾക്ക് ഏകദേശം ഇരട്ടി വിലയുണ്ടെന്നും RCMP ചൂണ്ടിക്കാട്ടി.