കാനഡയും ആൽബർട്ടയും പുതിയ പൈപ്പ് ലൈൻ കരാറിൽ ഒപ്പു വെച്ചു. ബി.സി. ടാങ്കർ നിരോധനത്തിൽ മാറ്റങ്ങൾക്ക് സാധ്യത

പ്രധാനമന്ത്രി മാർക്ക് കാർണിയും ആൽബർട്ടാ പ്രീമിയർ ഡാനിയേൽ സ്മിത്തും വെസ്റ്റ് കോസ്റ്റിലേക്ക് എണ്ണ കൊണ്ടുപോകുന്ന പുതിയ പൈപ്പ്‌ലൈൻ നിർമ്മിക്കുന്നതിനുള്ള ധാരണാപത്രത്തിൽ (MOU) ഒപ്പുവെച്ചു. വ്യാഴാഴ്ച കാൽഗറിയിൽ നടന്ന ചടങ്ങിലാണ് സുപ്രധാന കരാർ ഒപ്പിട്ടത്. ഏഷ്യൻ വിപണികളിലേക്ക് ആഴക്കടൽ തുറമുഖം വഴി എണ്ണ കയറ്റുമതി ചെയ്യുന്നതിന് ഫെഡറൽ സർക്കാർ വഴിയൊരുക്കുമെന്നും, ആവശ്യമെങ്കിൽ തീരദേശ ടാങ്കർ നിരോധനത്തിൽ മാറ്റങ്ങൾ വരുത്താൻ തയ്യാറാണെന്നും ഇരു നേതാക്കളും സമ്മതിച്ചു.

ദേശീയ പ്രാധാന്യമുള്ള ഒരു പദ്ധതിയായി അംഗീകരിക്കപ്പെടുന്നതിനെയും, തദ്ദേശീയ സമൂഹങ്ങൾക്ക് അതിൽ സഹ ഉടമസ്ഥത നേടാനും സാമ്പത്തിക നേട്ടങ്ങൾ പങ്കിടാനും അവസരം നൽകുന്നതിനെയും ആശ്രയിച്ചിരിക്കും ഈ പൈപ്പ്‌ലൈനിനുള്ള ഫെഡറൽ സർക്കാരിൻ്റെ പിന്തുണയെന്ന് ധാരണാപത്രത്തിലുണ്ട്. ഇത് ആൽബെർട്ടക്കാർക്ക് ഒരു മികച്ച ദിവസമാണെന്നും നിക്ഷേപ കാലാവസ്ഥയെ ദോഷകരമായി ബാധിച്ചിരുന്ന പഴയ നിയമങ്ങൾ ഒഴിവാക്കാൻ ഇത് സഹായിക്കുമെന്നും പ്രീമിയർ സ്മിത്ത് പറഞ്ഞു.

ദിവസേന കുറഞ്ഞത് ഒരു ദശലക്ഷം ബാരൽ എണ്ണ കൊണ്ടുപോകാൻ ശേഷിയുള്ള പൈപ്പ്‌ലൈൻ സ്വകാര്യമേഖലയാണ് നിർമ്മിക്കുകയും ധനസഹായം നൽകുകയും ചെയ്യുക. ഏഷ്യയിലേക്കുള്ള കയറ്റുമതിക്ക് ഇത് മുൻഗണന നൽകും. ഇത് ഒരു ഊർജ്ജ പരിവർത്തനത്തിന് വഴി തുറക്കുകയും വ്യാവസായിക പരിവർത്തനത്തിന് കളമൊരുക്കുകയും ചെയ്യുമെന്ന് കാർണി പറഞ്ഞു. പൈപ്പ്‌ലൈനിൻ്റെ പ്രത്യേക റൂട്ട് ഇതുവരെ തീരുമാനിച്ചിട്ടില്ലെങ്കിലും, ജൂലൈ ഒന്നിനകം പദ്ധതിയുടെ അപേക്ഷ സമർപ്പിക്കാൻ ധാരണാപത്രത്തിലുണ്ട്.  പദ്ധതി ഏറ്റെടുക്കാൻ താൽപ്പര്യമുള്ള സ്വകാര്യ സംരംഭകരെ കണ്ടെത്താനാകുമെന്ന് പ്രീമിയർ ഡാനിയേൽ സ്മിത്ത് ആത്മവിശ്വാസം പ്രകടിപ്പിച്ചു.