ഗ്രേറ്റർ സഡ്‌ബറിയിൽ തോക്കുപയോഗിച്ചുള്ള അക്രമ സംഭവങ്ങൾ കഴിഞ്ഞ അഞ്ച് വർഷത്തെ ഏറ്റവും ഉയർന്ന നിലയിൽ

ഗ്രേറ്റർ സഡ്‌ബറിയിൽ തോക്കുപയോഗിച്ചുള്ള അക്രമ സംഭവങ്ങൾ കഴിഞ്ഞ അഞ്ച് വർഷത്തെ ഏറ്റവും ഉയർന്ന നിലയിലെത്തിയതായി റിപ്പോർട്ട്., അനധികൃത മയക്കുമരുന്ന് വ്യാപാരവുമായി ബന്ധപ്പെട്ടാണ് മിക്ക വെടിവെപ്പുകളും ഉണ്ടായത്. ഇതേ തുടർന്ന് താമസക്കാർക്കിടയിൽ അരക്ഷിതാവസ്ഥ വർധിക്കുകയും ചിലർ ഇവിടം വിട്ടുപോകാൻ ഒരുങ്ങുന്നതായും റിപ്പോർട്ടുണ്ട്..

ഗ്രേറ്റർ ടൊറൻ്റോ ഏരിയയിൽ നിന്നും മറ്റ് തെക്കൻ ഒൻ്റാരിയോ നഗരങ്ങളിൽ നിന്നുമുള്ള സംഘങ്ങളാണ് മയക്കുമരുന്ന് വിൽപ്പനയ്ക്കായി ഇവിടേയ്ക്ക് വരുന്നത്. സമീപകാലത്ത് കുറ്റം ചുമത്തപ്പെട്ട പല പ്രതികൾക്കും ക്രിമിനൽ പശ്ചാത്തലങ്ങളുണ്ട്, ചിലർക്ക് ടൊറൻ്റോയിൽ നടന്ന മുൻകാല അക്രമങ്ങളുമായി ബന്ധമുള്ളതായി പൊലീസ് കണ്ടെത്തിയിട്ടുണ്ട്. മയക്കുമരുന്ന് കടത്തുന്നതിനും തോക്കുകൾ കൈവശം വയ്ക്കുന്നതിനും യുവാക്കളെയാണ് സംഘങ്ങൾ കൂടുതലായി ഉപയോഗിക്കുന്നത്, കാരണം അവർക്ക് യുവജന നിയമപ്രകാരം കുറഞ്ഞ ശിക്ഷയേ ലഭിക്കൂ.

ഒൻ്റാരിയോയിൽ പിടിച്ചെടുക്കുന്ന അനധികൃത തോക്കുകളിൽ ഭൂരിഭാഗവും യുണൈറ്റഡ് സ്റ്റേറ്റ്സിൽ നിന്നാണ് എത്തുന്നത്. ഡീലർമാർ വാടകക്കാർക്ക് മയക്കുമരുന്ന് നൽകി അവരുടെ വീടുകൾ മയക്കുമരുന്ന് കേന്ദ്രങ്ങളായി ഉപയോഗിക്കുന്ന രീതിയും ഇപ്പോൾ വ്യാപകമാണ്. 2025-ൽ ഇതുവരെ തോക്കുകൾ ഉപയോഗിച്ചുള്ള എട്ട് കൊലപാതക ശ്രമങ്ങളും കൊലപാതകങ്ങളും ഗ്രേറ്റർ സഡ്‌ബറി പോലീസ് റിപ്പോർട്ട് ചെയ്തിട്ടുണ്ട്. ഇത് മുൻ വർഷങ്ങളേക്കാൾ വളരെ കൂടുതലാണ്. ഈ വർഷം നടന്ന അഞ്ച് കൊലപാതകങ്ങളിൽ നാലെണ്ണം മയക്കുമരുന്ന് കടത്തുമായി ബന്ധമുള്ളതാണ്. മാത്രമല്ല GTA ആസ്ഥാനമായുള്ള സംഘങ്ങളിൽ നിന്ന് ഏകദേശം രണ്ട് മില്യൺ ഡോളർ വിലമതിക്കുന്ന മയക്കുമരുന്നുകളും ആയുധങ്ങളും പിടിച്ചെടുത്തിട്ടുണ്ട്.