ഗാല്വസ്റ്റണ് കൊലപാതകം: 88-കാരനായ ഭര്ത്താവിന്റെ ജാമ്യത്തുക കുറച്ചു
By: 600002 On: Nov 19, 2025, 2:15 PM
പി പി ചെറിയാന്
ഗാല്വസ്റ്റണ്(ടെക്സാസ്): സ്വന്തമായി കാര്യങ്ങള് ചെയ്യാന് പോലും ബുദ്ധിമുട്ടുള്ള 88-കാരനായ ഏണസ്റ്റ് ലിയാലിന്റെ (Ernest Leal) ജാമ്യത്തുകയാണ് മജിസ്ട്രേറ്റ് കോടതി കുറച്ചത്.
രോഗശയ്യയിലായിരുന്ന ഭാര്യ 89-കാരിയായ അനിത ലിയാലിനെ (Anita Leal) വെടിവെച്ച് കൊലപ്പെടുത്തിയ കേസിലാണ് ഏണസ്റ്റ് അറസ്റ്റിലായത്. തിങ്കളാഴ്ച പുലര്ച്ചെ 4:20-ന് ഗാല്വസ്റ്റണിലെ വീട്ടിലാണ് സംഭവം. ഹൃദയ നിരീക്ഷണ സംവിധാനത്തില് നിന്ന് മുന്നറിയിപ്പ് ലഭിച്ച് വീട്ടിലെത്തിയ പാരാമെഡിക്കല് ജീവനക്കാരോട് താനാണ് ഭാര്യയെ വെടിവെച്ച് കൊന്നതെന്ന് ഇയാള് പറയുകയായിരുന്നു.
തലയ്ക്ക് വെടിയേറ്റ് കട്ടിലില് കിടക്കുന്ന നിലയിലാണ് അനിതയുടെ മൃതദേഹം കണ്ടെത്തിയത്. കൊലപാതകത്തിന് ഉപയോഗിച്ച തോക്ക് കിടപ്പുമുറിയില് തറയില് ഉണ്ടായിരുന്നു.കൊലപാതക കുറ്റത്തിന് ആദ്യം 250,000 ഡോളര് ആയിരുന്നു ഏണസ്റ്റിന്റെ ജാമ്യത്തുക.
ജയിലില് നടന്ന ഹിയറിംഗില് വീല്ച്ചെയറിലായിരുന്ന ഇദ്ദേഹത്തിന് കോടതി നിയമിച്ച അഭിഭാഷകനെ അനുവദിച്ചു. തുടര്ന്ന് ജാമ്യത്തുക 80,000 ഡോളര് ആയി കുറച്ചു. പ്രായവും ആരോഗ്യപ്രശ്നങ്ങളും കാരണം ഏണസ്റ്റിന് സഹായമില്ലാതെ സ്വന്തം കാര്യങ്ങള് ചെയ്യാന് കഴിയില്ലെന്ന് അധികൃതര് സ്ഥിരീകരിച്ചിട്ടുണ്ട്. കൊലപാതകത്തിന്റെ കാരണം പോലീസ് ഇതുവരെ വെളിപ്പെടുത്തിയിട്ടില്ല.