ഡെമോക്രാറ്റിക് നേതൃമാറ്റം ആവശ്യപ്പെട്ട് റോ ഖന്ന: ഷൂമര് പാര്ട്ടിയുടെ ഭാവിയല്ലെന്ന് വിമര്ശനം
By: 600002 On: Nov 19, 2025, 12:54 PMപി പി ചെറിയാന്
വാഷിങ്ടണ് ഡി.സി: ഡെമോക്രാറ്റിക് പാര്ട്ടി നേതൃത്വത്തില് മാറ്റം വരുത്തണമെന്ന് ആവശ്യപ്പെട്ട് കാലിഫോര്ണിയന് പ്രതിനിധി റോ ഖന്ന വീണ്ടും രംഗത്ത്. സെനറ്റ് മൈനോറിറ്റി ലീഡര് ചക്ക് ഷൂമര് ഇനി പാര്ട്ടിയുടെ ഭാവിയല്ലെന്ന് ഖന്ന തുറന്നടിച്ചു.
ഷൂമര്ക്ക് ഡെമോക്രാറ്റിക് വോട്ടര്മാര്ക്ക് ആത്മവിശ്വാസം നല്കാനോ പ്രചോദിപ്പിക്കാനോ കഴിയുന്നില്ല. അദ്ദേഹം ധൈര്യശാലിയല്ല, സാധാരണ ജനങ്ങളില് നിന്ന് അകന്നുനില്ക്കുന്നു. ഇറാഖ് യുദ്ധത്തിന് അദ്ദേഹം പിന്തുണ നല്കി. ഗാസ വിഷയത്തില് ധാര്മികമായ വ്യക്തതയില്ല. ആരോഗ്യ സംരക്ഷണത്തിനു വേണ്ടി ശക്തമായി പോരാടാന് അദ്ദേഹത്തിന് കഴിഞ്ഞില്ല.അടുത്തിടെ സെനറ്റില് നടന്ന സുപ്രധാന വോട്ടെടുപ്പില് ഡെമോക്രാറ്റുകളെ ഒരുമിപ്പിച്ച് നിര്ത്തുന്നതില് ഷൂമര് പരാജയപ്പെട്ടതായി ഖന്ന കുറ്റപ്പെടുത്തി.
ചക്ക് ഷൂമറിന് പകരക്കാരായി ഖന്ന പുതിയ തലമുറ ഡെമോക്രാറ്റിക് നേതാക്കളെ പിന്തുണച്ചു. സെനറ്റര്മാരായ ക്രിസ് മര്ഫി (കണക്റ്റിക്കട്ട്), കോറി ബുക്കര് (ന്യൂജേഴ്സി), ബ്രയാന് ഷാറ്റ്സ് (ഹവായ്) എന്നിവരെ ഖന്ന 'ചലനാത്മകരായ' (Dynamic) നേതാക്കളായി വിശേഷിപ്പിച്ചു. സെനറ്റര് എലിസബത്ത് വാറന്റെ (മാസച്യൂസറ്റ്സ്) ആശയങ്ങളെയും അദ്ദേഹം അഭിനന്ദിച്ചു.
എങ്കിലും, സെനറ്റര് ടിം കെയ്ന് ഉള്പ്പെടെയുള്ള ചില ഡെമോക്രാറ്റുകള് ഷൂമറിനെ പിന്തുണച്ച് രംഗത്തെത്തി. ന്യൂനപക്ഷ നേതാവായിരിക്കുക പ്രയാസമുള്ള കാര്യമാണെന്നും, സെനറ്റര്മാര് എളുപ്പത്തില് നേതാവിനെ അനുസരിക്കുന്നവരല്ലെന്നും കെയ്ന് പറഞ്ഞു. ഹൗസ് നേതൃത്വത്തെക്കുറിച്ച് അഭിപ്രായം പറയാന് താന് ഇല്ലെന്നും, ഖന്ന ഹൗസ് കാര്യങ്ങളില് ശ്രദ്ധിക്കണമെന്നും കെയ്ന് കൂട്ടിച്ചേര്ത്തു.