ആൽബെർട്ടയിലെ കുറഞ്ഞ വേതനം വർദ്ധിപ്പിക്കണമെന്ന് ആവശ്യപ്പെട്ട് പുതിയ ബില്ലുമായി NDP

പ്രവിശ്യയിലെ കുറഞ്ഞ വേതനം വർദ്ധിപ്പിക്കണമെന്ന് ആവശ്യപ്പെട്ടുള്ള തങ്ങളുടെ പുതിയ ബില്ലിനെ പിന്തുണയ്ക്കണമെന്ന് NDP ആൽബെർട്ട സർക്കാരിനോട് ആവശ്യപ്പെട്ടു. പ്രൊട്ടക്റ്റ് വർക്കേഴ്സ് പേ ആക്ട്' എന്ന് പേരിട്ടിരിക്കുന്ന ഈ ബിൽ, കുറഞ്ഞ വേതനം മൂന്ന് വർഷത്തേക്ക് ഓരോ വർഷവും 1 ഡോളർ വീതം വർദ്ധിപ്പിക്കാനാണ് ലക്ഷ്യമിടുന്നത്. ഇതോടെ, 2027 ഒക്ടോബറോടെ കുറഞ്ഞ വേതനം മണിക്കൂറിന് $18 ആകും.

നിലവിൽ ആൽബെർട്ടയിലെ കുറഞ്ഞ വേതനം മണിക്കൂറിന് $15 ആണ്. 2018ന് ശേഷം ഇതിൽ വർദ്ധന വരുത്തിയിട്ടില്ല. എന്നാൽ, 18 വയസ്സിന് താഴെയുള്ള തൊഴിലാളികൾക്ക് മണിക്കൂറിന് $13 നൽകിയാൽ മതി. ഈ രീതിക്ക് അവസാനമിട്ട് 18 വയസ്സിന് താഴെയുള്ള തൊഴിലാളികൾക്കും മുതിർന്നവരെപ്പോലെ തന്നെ വേതനം ലഭിക്കാനും പുതിയ ബിൽ നിർദ്ദേശിക്കുന്നു. ടിപ്പുകൾ ലഭിക്കുന്ന തൊഴിലാളികൾക്ക്, അത് നേരിട്ട് തന്നെ ലഭിക്കുന്നുണ്ടെന്ന് ഉറപ്പാക്കാനുള്ള ഒരു നിർദ്ദേശവും ബില്ലിൽ ഉൾപ്പെടുത്തിയിട്ടുണ്ട്. വേതനം ജീവിതച്ചെലവിന് അനുസൃതമായി നിലനിർത്താൻ, കുറഞ്ഞ വേതനത്തെ ഉപഭോക്തൃ വില സൂചികയുമായി ബന്ധിപ്പിക്കാനും ബിൽ നിർദ്ദേശിക്കുന്നുണ്ട്.

പുതിയ ബിൽ നീതിക്ക് വേണ്ടിയുള്ളതാണെന്നും, തൊഴിലാളികൾക്ക് അവരുടെ ദൈനംദിന ചെലവുകൾ താങ്ങാൻ സഹായിക്കുന്നതിന് വേണ്ടിയാണെന്നും എൻഡിപി നേതാവ് നഹീദ് നേഷി പറഞ്ഞു. എന്നാൽ കുറഞ്ഞ വേതനം വർദ്ധിപ്പിക്കുന്നത് ബിസിനസ്സുകളെ ദോഷകരമായി ബാധിക്കാനും യുവജനങ്ങളുടെ തൊഴിലില്ലായ്മ വർദ്ധിപ്പിക്കാനും സാധ്യതയുണ്ടെന്നാണ് ഭരണകക്ഷിയായ യുണൈറ്റഡ് കൺസർവേറ്റീവ് പാർട്ടിയുടെ നിലപാട്. മുൻപ് വേതനം വർദ്ധിപ്പിച്ചത് 21,000-ത്തിലധികം യുവജനങ്ങളുടെ തൊഴിലവസരങ്ങൾ നഷ്ടപ്പെടാൻ കാരണമായെന്നും ഒരു യുസിപി വക്താവ് പറഞ്ഞു.