ഓപ്പൺ എ.ഐയുടെ 'സോറ 2' വിപണിയിൽ നിന്ന് പിൻവലിക്കണമെന്ന് ആവശ്യപ്പെട്ട് പബ്ലിക് സിറ്റിസൺ എന്ന ഉപഭോക്തൃ സംഘടന

 

ഓപ്പൺ എ.ഐ-യുടെ പുതിയ എ.ഐ. വീഡിയോ ആപ്പായ 'സോറ 2' വിപണിയിൽ നിന്ന് പിൻവലിക്കണമെന്ന് ആവശ്യപ്പെട്ട് പബ്ലിക് സിറ്റിസൺ എന്ന ഉപഭോക്തൃ സംഘടന. സുരക്ഷയുൾപ്പടെയുള്ള കാര്യങ്ങളിൽ വീഴ്ചകളുണ്ടെന്ന് ചൂണ്ടിക്കാട്ടി സംഘടന ഓപ്പൺഎ.ഐ-ക്കും സി.ഇ.ഒ. സാം ആൾട്ട്മാനും കത്തയച്ചു. പ്രധാനപ്പെട്ട സുരക്ഷാ പ്രശ്നങ്ങൾ പരിഹരിക്കുന്നതുവരെ ആപ്പ് ലഭ്യമാക്കുന്നത് നിർത്തിവെക്കാൻ അവർ ഓപ്പൺഎ.ഐ-യോട് ആവശ്യപ്പെട്ടു. എ.ഐ. ജനറേറ്റഡ് ഉള്ളടക്കങ്ങളുടെ അപകടസാധ്യതകളെക്കുറിച്ച് അവബോധം വളർത്തുന്നതിനായി യു.എസ്. കോൺഗ്രസിനും ഗ്രൂപ്പ് തങ്ങളുടെ ആശങ്കകൾ കൈമാറി.

ഡീപ്ഫേക്ക് വീഡിയോകൾ നിർമ്മിക്കാനും തെറ്റായ വിവരങ്ങൾ പ്രചരിപ്പിക്കാനും സോറ 2 ഉപയോഗിക്കപ്പെടാൻ സാധ്യതയുണ്ടെന്നും ഇത് സ്വകാര്യതയ്ക്കും ജനാധിപത്യത്തിനും ഭീഷണിയാണെന്നും പബ്ലിക് സിറ്റിസൺ മുന്നറിയിപ്പ് നൽകി. സ്ത്രീകളെ ചൂഷണം ചെയ്യാൻ ഉപയോഗിച്ചേക്കാവുന്ന വ്യാജ വീഡിയോകൾ ഈ ആപ്പിന് സൃഷ്ടിക്കാൻ കഴിയുമെന്നും അവർ ചൂണ്ടിക്കാട്ടി. ഉപയോക്താക്കളെ സംരക്ഷിക്കാൻ ആവശ്യമായ സുരക്ഷാ സംവിധാനങ്ങൾ ഇല്ലാതെയാണ് ഓപ്പൺഎ.ഐ. സോറ 2 അതിവേഗം പുറത്തിറക്കിയതെന്ന് കത്തിൽ എടുത്തുപറയുന്നു. പ്രശ്നങ്ങൾ പരിഹരിച്ചതിന് ശേഷം പുറത്തിറക്കുന്നതിന് പകരം, പൊതുജനരോഷം ഉണ്ടാകുമ്പോൾ മാത്രം പ്രതികരിക്കുന്ന ഓപ്പൺഎ.ഐ-യുടെ നിലപാടിനെ പബ്ലിക് സിറ്റിസൺ വിമർശിച്ചു.

ഓപ്പൺഎ.ഐ-യുടെ ചാറ്റ്ബോട്ട് ആയ 'ചാറ്റ്ജി.പി.ടി.' ഉപയോക്താക്കൾക്ക് ദോഷം വരുത്തിയെന്ന് ആരോപിച്ച് കമ്പനിക്കെതിരെ നേരത്തെയും കേസുകൾ വന്നിട്ടുണ്ട്. സുരക്ഷയെക്കാൾ വളർച്ചയ്ക്ക് മുൻഗണന നൽകുന്നതിനാലാണ് ഇതെന്നും പബ്ലിക് സിറ്റിസൺ പറഞ്ഞു.