കൂടുതൽ ആധുനികമായ 9-1-1 സംവിധാനത്തിലേക്ക് മാറി കാൽഗറി

നിശ്ചയിച്ച സമയപരിധിക്കും മുൻപെ പുതിയ 9-1-1 സംവിധാനത്തിലേക്ക് മാറി കാൽഗറി നഗരം. 2027 മാർച്ച് വരെ സമയം ഉണ്ടായിരുന്നു എങ്കിലും, 2025 ഒക്ടോബർ 30-ന് തന്നെ നഗരം നെക്സ്റ്റ് ജനറേഷൻ 9-1-1 സംവിധാനത്തിലേക്ക് മാറി. കൂടുതൽ ആധുനികവും കോളുകളും ഡാറ്റയും കൈമാറാൻ ഇൻ്റർനെറ്റ് പ്രോട്ടോക്കോൾ  ഉപയോഗിക്കുന്നതുമാണ്  പുതിയ സംവിധാനം. ഇത് പഴയ സംവിധാനത്തേക്കാൾ ശക്തവും കൂടുതൽ ആശ്രയിക്കാവുന്നതുമാണ്.

അടിയന്തര ഘട്ടങ്ങളിൽ തത്സമയ ടെക്സ്റ്റ് മെസ്സേജിംഗ് പോലുള്ള സവിശേഷതകൾ പുതിയ സംവിധാനത്തിലുണ്ട്. ഇതോടെ കൂടുതൽ വേഗത്തിലും എളുപ്പത്തിലും സഹായം ലഭിക്കാൻ കഴിയും.എന്നാൽ പോലീസ്, ഫയർ, ആംബുലൻസ് സഹായങ്ങൾക്കായി തുടർന്നും 9-1-1-ലേക്ക് തന്നെയാണ് വിളിക്കേണ്ടത്. പുതിയ സംവിധാനത്തിന് മികച്ച സൈബർ സുരക്ഷയുമുണ്ട്. കാൽഗറിയുടെ 9-1-1 സെൻ്റർ ഓരോ വർഷവും പത്ത് ലക്ഷത്തിലധികം കോളുകൾക്ക് മറുപടി നൽകുന്നുണ്ട്. 2027-ഓടെ എല്ലാ സ്ഥലങ്ങളും പുതിയ സംവിധാനത്തിലേക്ക് മാറിയ ശേഷം കൂടുതൽ പുതിയ സവിശേഷതകൾ ലഭ്യമാകുമെന്നാണ് പ്രതീക്ഷിക്കപ്പെടുന്നത്.