അമേരിക്കയില് കാര്ഗോ വിമാനം തകര്ന്നുവീണ് ഏഴ് പേര് മരിച്ചു
By: 600002 On: Nov 5, 2025, 10:10 AM
അമേരിക്കയില് ടേക്ക് ഓഫിനിടെ കാര്ഗോ വിമാനം തകര്ന്നുവീണു. അപകടത്തില് ഏഴ് പേര് കൊല്ലപ്പെട്ടതായാണ് റിപ്പോര്ട്ട്. 11 പേര്ക്ക് പരിക്കേല്ക്കുകയും ചെയ്തു. കെന്റക്കിയില് ലൂയിവില്ലെ അന്താരാഷ്ട്ര വിമാനത്താവളത്തിനു സമീപമാണ് വിമാനം തകര്ന്നുവീണത്. പ്രാദേശികസമയം വൈകിട്ട് അഞ്ചേകാലോടെയാണ് അപകടമുണ്ടായത്. യുപിഎസ് ലോജിസ്റ്റിക് കമ്പനിയുടെ 1991ല് നിര്മിച്ച ഡഗ്ലസ് എം ഡി-11 വിമാനമാണ് വ്യവസായ മേഖലയില് തകര്ന്നുവീണത്.
മൂന്നുപേരാണ് വിമാനത്തിലുണ്ടായിരുന്നത്. വിമാനത്തില് രണ്ടു ലക്ഷത്തി എണ്പതിനായിരം ഗാലണ് ഇന്ധനമുണ്ടായിരുന്നു. അപകടത്തിന് പിന്നാലെ വിമാനത്താവളം താല്ക്കാലികമായി അടച്ചു. ഹവായിയിലെ ഹോണോലുലുവിലേക്ക് പോകുന്നതിനിടെ ആണ് അപകടമുണ്ടായത്. ഫെഡറല് ഏവിയേഷന് അഡ്മിനിസ്ട്രേഷന് സംഭവത്തില് അന്വേഷണം ആരംഭിച്ചു. നിരവധി വ്യവസായ സ്ഥാപനങ്ങളുള്ള സ്ഥലത്താണ് വിമാനം തകര്ന്നുവീണത്.