ചരിത്രത്തിലെ ഏറ്റവും ദൈര്ഘ്യമേറിയ അടച്ചുപൂട്ടലിലേക്ക് അമേരിക്ക നീങ്ങുന്നു
By: 600002 On: Nov 4, 2025, 10:20 AM
അമേരിക്കയില് സര്ക്കാര് സേവനങ്ങളുടെ ഷട്ട്ഡൗണ് 35 ആം ദിവസത്തിലേക്ക് കടന്നു. ഇതോടെ രാജ്യം ചരിത്രത്തിലേക്ക് ഏറ്റവും ദൈര്ഘ്യമേറിയ അടച്ചുപൂട്ടലിലേക്ക് കടക്കുകയാണ്. ഡോണള്ഡ് ട്രംപിന്റെ ആദ്യ ഭരണകാലയളവില് നടന്ന 35 ദിവസം നീണ്ട അടച്ചുപൂട്ടലാണ് അമേരിക്കന് ചരിത്രത്തിലെ ഏറ്റവും ദൈര്ഘ്യമേറിയത്.
ആരോഗ്യ ഇന്ഷുറന്സ് സബ്സിഡികള് നിലനിര്ത്തണമെന്നാവശ്യപ്പെട്ട് ഡെമോക്രാറ്റുകള് ധനാനുമതി ബില് സെനറ്റില് പരാജയപ്പെടുത്തിയതാണ് അടച്ചുപൂട്ടലിന് കാരണം.
ധനാനുമതി ബില് ഇതുവരെ 13 തവണ സെനറ്റില് പരാജയപ്പെട്ടു. ബില് പാസാക്കാന് സെനറ്റില് 60 വോട്ടുകളാണ് ആവശ്യമായത്. സെനറ്റ് നിയമത്തില് ഭേദഗതി വരുത്തി ഷട്ട്ഡൗണ് ഒഴിവാക്കാനുള്ള ശ്രമത്തിലാണ് ട്രംപ്.
രാജ്യത്തെ ഏകദേശം ഏഴര ലക്ഷത്തോളം സര്ക്കാര് ജീവനക്കാര് കഴിഞ്ഞ ഒരു മാസമായി നിര്ബന്ധിത അവധിയിലാണ്. കൂടാതെ, ഏഴ് ലക്ഷത്തി മുപ്പതിനായിരം സര്ക്കാര് ജീവനക്കാര് ശമ്പളമില്ലാതെ ജോലി ചെയ്യുകയാണ്. ഷട്ട്ഡൗണിന്റെ പശ്ചാത്തലത്തില് അമേരിക്കയിലെ വിമാനത്താവള പ്രവര്ത്തനങ്ങള് വരെ പ്രതിസന്ധിയിലായി. സര്ക്കാര് സേവനങ്ങള് നിലയ്ക്കുന്നത് സാധാരണക്കാരേയും ബാധിക്കുകയാണ്.