ഒൻ്റാരിയോയിൽ സ്പീഡ് ക്യാമറകൾ നീക്കം ചെയ്യാനുള്ള തീരുമാനം വിവാദത്തിൽ

ഒൻ്റാരിയോയിലെ മുനിസിപ്പാലിറ്റികളിൽ സ്ഥാപിച്ചിട്ടുള്ള ഓട്ടോമേറ്റഡ് സ്പീഡ് എൻഫോഴ്‌സ്‌മെൻ്റ്  ക്യാമറകൾ രണ്ടാഴ്ചയ്ക്കുള്ളിൽ നീക്കം ചെയ്യുമെന്ന് പ്രവിശ്യാ സർക്കാർ പ്രഖ്യാപിച്ചു. ഈ നീക്കം ജനങ്ങൾക്കിടയിലും പ്രാദേശിക ഭരണകൂടങ്ങൾക്കിടയിലും വലിയ തർക്കങ്ങൾക്ക് വഴിവെച്ചിരിക്കുകയാണ്. സ്പീഡ് ക്യാമറകളെ പണം തട്ടാനുള്ള മാർഗം എന്ന് വിശേഷിപ്പിച്ചാണ് പ്രീമിയർ ഡഗ് ഫോർഡ് ഈ നിയമനിർമ്മാണത്തിന് മുൻകൈയെടുത്തത്.

ജനങ്ങൾക്ക് സാമ്പത്തിക ആശ്വാസം നൽകുക എന്ന ലക്ഷ്യത്തോടെയാണ് ഈ നടപടിയെന്നാണ് സർക്കാർ വാദം. സ്പീഡ് ക്യാമറകൾ നിരോധിക്കുന്നതിനുള്ള നിയമം അടുത്ത മാസം തന്നെ അവതരിപ്പിക്കും. ക്യാമറകൾ നീക്കം ചെയ്യുന്നതിനു പകരമായി, സ്പീഡ് ബമ്പുകൾ, ഉയർന്ന ക്രോസ് വാക്കുകൾ തുടങ്ങിയ മറ്റ് ട്രാഫിക് നിയന്ത്രണ മാർഗ്ഗങ്ങൾക്കായി നഗരസഭകൾക്ക് ഫണ്ട് നൽകാമെന്നും സർക്കാർ അറിയിച്ചിട്ടുണ്ട്. Vaughan  പോലുള്ള ചില നഗരസഭകൾ ഇതിനോടകം തന്നെ സ്പീഡ് ക്യാമറ പ്രോഗ്രാം നിർത്തലാക്കാൻ തീരുമാനിച്ചിരുന്നു.

ടൊറൻ്റോ നഗരത്തിലെ സ്കൂൾ സോണുകളിലെ വേഗത 45 ശതമാനം വരെ കുറയ്ക്കാൻ സ്പീഡ് ക്യാമറകൾ സഹായിച്ചതായി പഠനങ്ങൾ പറയുന്നു. ഈ സാഹചര്യത്തിൽ, ഈ സുരക്ഷാ സംവിധാനം നീക്കം ചെയ്യുന്നതിനെതിരെ ടൊറൻ്റോ മേയർ ഒലിവിയ ചൗ ഉൾപ്പെടെയുള്ളവർ ശക്തമായ എതിർപ്പ് പ്രകടിപ്പിച്ചു.  കാൽനടയാത്രക്കാരുടെ സുരക്ഷയ്ക്ക് ക്യാമറകൾ നിർബന്ധമാണെന്ന് ചൂണ്ടിക്കാട്ടി ഒൻ്റാരിയോയിലെ മുനിസിപ്പാലിറ്റികളുടെ അസോസിയേഷനും സർക്കാരിൻ്റെ തീരുമാനത്തിനെതിരെ രംഗത്തെത്തിയിട്ടുണ്ട്. സ്പീഡ് ക്യാമറകൾ നീക്കം ചെയ്താൽ വേഗത വീണ്ടും കൂടുമെന്നും അപകടങ്ങൾ വർധിക്കുമെന്നും വിദഗ്ദ്ധർ മുന്നറിയിപ്പ് നൽകുന്നു.