'മാഗ്' തിരഞ്ഞെടുപ്പ് ആവേശപ്പോരാട്ടത്തിലേക്ക്; രണ്ടു ശക്തമായ പാനലുകള്, ഒഴിവാകുമോ മത്സരം ? ഒരുമിക്കൂ മാഗിന് വേണ്ടി
By: 600002 On: Oct 27, 2025, 12:45 PM
പി പി ചെറിയാന്
ഹൂസ്റ്റണ്: ഡിസംബര് രണ്ടാം വാരത്തില് നടക്കാനിരിക്കുന്ന അമേരിക്കയിലെ ഏറ്റവും വലിയ മലയാളി സംഘടനയായ മലയാളി അസോസിയേഷന് ഓഫ് ഗ്രേറ്റര് ഹൂസ്റ്റണ് (MAGH) ഡയറക്ടര് ബോര്ഡ് തിരഞ്ഞെടുപ്പിനായി ഹൂസ്റ്റണ് മലയാളികളും അമേരിക്കയിലെ മലയാളി സമൂഹവും ആകാംക്ഷയോടെ കാത്തിരിക്കുകയാണ്.
നോര്ത്ത് അമേരിക്കയിലെ ഏറ്റവും പഴക്കമുള്ളതും ശക്തമായ ഘടനയുള്ളതുമായ, നിരവധി അംഗീകാരങ്ങളും അവാര്ഡുകളും നേടിയിരിക്കുന്ന സജീവ പ്രസ്ഥാനമാണ് മാഗ് ഹൂസ്റ്റണ്. നഗരത്തിന്റെ ഹൃദയഭാഗത്ത് വിശാലമായ പാര്ക്കിംഗ് സൗകര്യത്തോടുകൂടിയ രണ്ട് മിനി ഹാളുകളും, സ്പോര്ട്സ് പരിപാടികള്ക്കുള്ള പ്രത്യേക സൗകര്യങ്ങളും ഇവിടെയുണ്ട്. അതിനൊപ്പം തന്നെ, വിശാലമായ ഓഡിറ്റോറിയം നിര്മ്മിക്കുന്നതിനുള്ള സ്ഥലം വാങ്ങിയതും അതിന്റെ വിജയത്തിനായി മുന്കാല ബോര്ഡുകളും നിലവിലെ കമ്മിറ്റി അംഗങ്ങളും ഉത്സാഹത്തോടെ പ്രവര്ത്തിച്ചുവരുന്നതും ശ്രദ്ധേയമാണ്.
പ്രശസ്ത കവി വൈലോപ്പിള്ളി ശ്രീധരമേനോന് പറഞ്ഞത് പോലെ
'മത്സരിക്കുന്നത് എന്തിന് നാം, വ്യഥാ!''
എന്ന ഈ വരികള് ഈ സാഹചര്യത്തിലും അത്ര തന്നെ പ്രസക്തമാണ്.
റോയി മാത്യുയും ചാക്കോ തോമസും നേതൃത്വത്തിലുള്ള രണ്ട് പാനലുകള് തിരഞ്ഞെടുപ്പിനായി രംഗത്തുണ്ട്. സാമൂഹിക ബന്ധങ്ങളും പ്രവര്ത്തനപരമായ പാരമ്പര്യങ്ങളും ഇരുപാനലുകളിലും കാണാം. എങ്കിലും പാനല് നിറയ്ക്കാനുള്ള തിരക്കില് ചിലരെയെങ്കിലും തള്ളിക്കയറ്റിയെന്ന അഭിപ്രായവുമുണ്ട്.
മാഗിന്റെ പുതിയ നിര്മ്മാണവും ഭാവി പദ്ധതികളും മുന്നോട്ട് കൊണ്ടുപോകാന് ഇരുപാനലുകളിലുമുള്ള മികച്ച സ്ഥാനാര്ത്ഥികളെ ചേര്ത്തെടുത്ത ഏകകണ്ഠമായ ഒരു പാനല് രൂപീകരിക്കണമെന്നതാണ് ഹൂസ്റ്റണിലെ ഭൂരിഭാഗം മലയാളികളുടെയും ആഗ്രഹം.
മാഗിന്റെ സ്ഥാപക നേതാക്കളുടെയും മുതിര്ന്ന അംഗങ്ങളുടെയും ഉപദേശത്തോടെ ഇത്തരമൊരു ഏകപാനല് രൂപീകരണം നടപ്പിലാക്കണമെന്ന് ശക്തമായ അഭിപ്രായമുണ്ട്.
പതിനാറ് ബോര്ഡ് അംഗങ്ങളെ തുല്യമായി ഇരുപാനലിലും പങ്കിട്ടും, പ്രസിഡന്റ് സ്ഥാനം ഒരു പാനലിന് നല്കി ആ പാനലില് നിന്ന് ഏഴും മറ്റേ പാനലിനു ഒന്പതും ആയി വിഭജിച്ചാല് ഒരു സമവാക്യം കണ്ടെത്താന് കഴിയും.
നാട്ടിലെ പഞ്ചായത്ത് മുനിസിപ്പല് കോര്പ്പറേഷന് തല മത്സരങ്ങളുടെതു പോലെ അനാവശ്യമായ സാമ്പത്തികവും സമയ നഷ്ടവുമുള്ള മത്സരങ്ങള് ഒഴിവാക്കി ആ ഊര്ജ്ജവും തുകയും മാഗിന്റെ പുതിയ നിര്മ്മാണത്തിനായി വിനിയോഗിക്കുന്നത് തന്നെ ഉത്തമം. ഹൂസ്റ്റണിലെ മിക്കവാറും ദേവാലയങ്ങളും അമ്പലങ്ങളും സന്ദര്ശിക്കുന്ന തിരക്കിലാണ് രണ്ടു പാനലംഗങ്ങളും. അതോടൊപ്പം ഒക്ടോബര് മാസം മുതല് തിരഞ്ഞെടുപ്പ് വരെ ഹൂസ്റ്റണില് നടക്കുന്ന എല്ലാ അസ്സോസിയേഷന് യോഗങ്ങളിലും മീറ്റിംഗുകളിലും കൂട്ടായ്മകളിലും പങ്കെടുക്കണം.മിക്കവാറും യോഗങ്ങളില് രണ്ടു പാനലംഗങ്ങളൂം തമ്മില് കണ്ടുമുട്ടും. ജോലിയില് നിന്ന് അവധിയെടുത്തും കുടുംബത്തിന് നല്കേണ്ട സമയത്തില് നിന്ന് സമയം കടമെടുത്തും എങ്ങനെയും മത്സരിച്ചു ജയിച്ചു കയറാനുള്ള തയ്യാറെടുപ്പാണ് നടക്കുന്നത്.
രണ്ട് പാനലുകളിലുമുള്ള സ്ഥാനാര്ത്ഥികളുടെ സാന്നിധ്യം മൂലം, സാധാരണയായി ആളുകള് കുറവായിരുന്ന മലയാളി യോഗങ്ങളില് ഇപ്പോള് കൂടുതല് പേര് എത്തുന്നതും ഒരു സാന്നിധ്യാനുഭവമാണ്.
മാഗിന്റെ പുരോഗതിക്കായി ഒറ്റപാനല് എന്ന ആശയം നടപ്പിലാകട്ടെ അതാണ് ഗ്രേറ്റര് ഹൂസ്റ്റണ് മലയാളികളുടെ ആഗ്രഹം.