ഇലക്ട്രിക് വാഹനങ്ങൾ ചാർജ് ചെയ്യുമ്പോൾ സുരക്ഷാ അംഗീകാരമുള്ള ഉപകരണങ്ങൾ മാത്രം ഉപയോഗിക്കണമെന്ന് വിദദ്ധരുടെ മുന്നറിയിപ്പ്, അല്ലെങ്കിൽ അപകടത്തിന് സാധ്യത

 

2024 ഓഗസ്റ്റിൽ ബ്രിട്ടീഷ് കൊളംബിയയിലെ ഹോപ്പിൽ വെച്ച് ടെസ്‌ല കാർ ചാർജ് ചെയ്യുന്നതിനിടെ ഉണ്ടായ സ്ഫോടനം അംഗീകാരമില്ലാത്ത അനുബന്ധ ഉൽപ്പന്നങ്ങൾ ഉപയോഗിച്ചത് മൂലമെന്ന് കണ്ടെത്തൽ. സ്‌ഫോടനത്തിൻ്റെ ദൃശ്യങ്ങൾ വീഡിയോയിൽ പതിഞ്ഞിരുന്നു. സ്ഫോടനത്തിൽ ഡ്രൈവർ തെറിച്ച് നിലത്തേക്ക് വീഴുന്നത് ഇതിൽ കാണാം.

മോൺട്രിയൽ കമ്പനിയായ A2Z EV നിർമ്മിച്ച ഒരു തേർഡ് പാർട്ടി ചാർജിംഗ് അഡാപ്റ്ററാണ് ഇവിടെ ഉപയോഗിച്ചിരുന്നത്. ചാർജിംഗ് സ്റ്റേഷനിലെ ഷോർട്ട് സർക്യൂട്ട് കാരണം അഡാപ്റ്ററിലൂടെ അസാധാരണമായ വോൾട്ടേജ് കടന്നുപോയതായി ടെക്നിക്കൽ സേഫ്റ്റി ബി.സി. അറിയിച്ചു. ഇത് ആർക്ക് ഫ്ലാഷ് സ്ഫോടനത്തിന് കാരണമാവുകയും ചാർജർ, കാർ, അഡാപ്റ്റർ എന്നിവയ്ക്ക് നാശനഷ്ടങ്ങൾ വരുത്തുകയും ചെയ്തു. ശക്തമായ സ്ഫോടനമായിരുന്നിട്ടും ഡ്രൈവർക്ക് നിസ്സാര പരിക്കുകൾ മാത്രമേ സംഭവിച്ചുള്ളൂ.

പ്രശ്നങ്ങളില്ലാതെ ഏകദേശം 50 തവണ ഉപയോഗിച്ചിട്ടുണ്ടെങ്കിലും ഈ അഡാപ്റ്ററിന് കാനഡയിൽ ഉപയോഗിക്കുന്നതിനുള്ള അംഗീകാരം ഉണ്ടായിരുന്നില്ല. സ്റ്റേഷനിലെ ബാറ്ററി സ്റ്റാക്കിലെ ഒരു തകരാറും സംഭവത്തിന് കാരണമായെന്ന് A2Z EV-യുടെ അന്വേഷണത്തിൽ കണ്ടെത്തി. ഈ തകരാർ കാരണം ഓട്ടോമാറ്റിക് ഷട്ട്ഡൗൺ ഉണ്ടായില്ല. അംഗീകാരമില്ലാത്ത അനുബന്ധ ഉൽപ്പന്നങ്ങൾ ഉപയോഗിക്കുന്നതിൻ്റെ അപകടമാണ് ഈ സ്ഫോടനത്തിലൂടെ വ്യക്തമാകുന്നതെന്ന് വിദഗ്ദ്ധർ പറയുന്നു. ഇലക്ട്രിക് വാഹനങ്ങൾ ചാർജ് ചെയ്യുമ്പോൾ സുരക്ഷാ അംഗീകാരമുള്ള ഉപകരണങ്ങൾ മാത്രം ഉപയോഗിക്കാനും A2Z EV-യും EV വക്താക്കളും ഡ്രൈവർമാരോട് ആവശ്യപ്പെടുന്നു.