H1ബി വിസ ഫീസ്: അമേരിക്കന് ചേംബര് ഓഫ് കോമേഴ്സ് ട്രംപ് ഭരണകൂടത്തിനെതിരെ നിയമനടപടിക്ക്
By: 600002 On: Oct 20, 2025, 9:08 AM
പി പി ചെറിയാന്
വാഷിങ്ടണ് ഡി.സി: അമേരിക്കയിലെ ഏറ്റവും വലിയ വ്യാപാര സംഘടനയായ യുഎസ് ചേംബര് ഓഫ് കോമേഴ്സ് H1ബി വിസ അപേക്ഷക്ക് 100,000 ഡോളര് ഫീസ് നിയമവിരുദ്ധമാണെന്ന് ആരോപിച്ച് ട്രംപ് ഭരണകൂടത്തിനെതിരെ കേസ് നല്കി.
ഒക്ടോബര് 17-ന് വാഷിങ്ടണിലുള്ള ജില്ലാ കോടതിയില് നല്കിയ പരാതിയില് ഈ ഫീസ് അമേരിക്കന് കമ്പനികള്ക്ക് വലിയ സാമ്പത്തിക ബാധ്യതയുണ്ടാക്കുമെന്നും, പ്രത്യേക കഴിവുള്ള വിദേശ തൊഴിലാളികളെ നിയമിക്കാന് തടസ്സമാകും എന്നും ചേംബര് അറിയിച്ചു.
സെപ്റ്റംബര് 19-ന് ട്രംപ് ഒപ്പുവെച്ച ഉത്തരവ് 'തെറ്റായ നയവും നിയമവിരുദ്ധവുമാണ്' എന്നും ഇത് അമേരിക്കയുടെ സാമ്പത്തിക എതിരാളികള്ക്ക് ഗുണകരമാകുമെന്നും അവര് പറഞ്ഞു.
യുഎസ് ചേംബര് ഓഫ് കോമേഴ്സിന്റെ വൈസ് പ്രസിഡന്റ് നീല്ബ്രാഡ്ലി, ഈ ഫീസ് അമേരിക്കന് തൊഴിലാളികള്ക്കുള്ള അവസരങ്ങള് കുറയ്ക്കുമെന്നും, യുഎസ് സാമ്പത്തികരംഗത്തിന് കൂടുതല് തൊഴിലാളികള് ആവശ്യമാണെന്നും അഭിപ്രായപ്പെട്ടു.
ഇത് ട്രംപ് ഭരണകൂടത്തിന്റെ പുതിയ H1ബി നയങ്ങള്ക്ക് എതിരായ രണ്ടാമത്തെ വലിയ കേസ് ആണ്. അതിന് മുമ്പ് വിദ്യാഭ്യാസ, മതസംഘടനകള് അടങ്ങിയ ഒരു കൂട്ടായ്മ ഒക്ടോബര് 3 ന് വിവാദ ഉത്തരവിനെതിരെ കേസ് നല്കിയിരുന്നു.
2024-ല് നല്കിയ H1ബി വിസകളില് 70% ഇന്ത്യയില് നിന്നുള്ള തൊഴിലാളികള്ക്കായിരുന്നു.