ലോകത്ത് ഏറ്റവും കൂടുതൽ തൊഴിൽപരമായ മാനസിക സമ്മർദ്ദം  അനുഭവിക്കുന്ന അധ്യാപകർ ആൽബർട്ടയിലേതെന്ന് അന്താരാഷ്ട്ര സർവ്വെ ഫലം

 

ആൽബർട്ടയിലെ അധ്യാപകർ ലോകത്തെ മറ്റ് അധ്യാപകരെ അപേക്ഷിച്ച് ഏറ്റവും കൂടുതൽ തൊഴിൽപരമായ മാനസിക സമ്മർദ്ദം  അനുഭവിക്കുന്നവരാണെന്ന് പുതിയ  അന്താരാഷ്ട്ര സർവേ ഫലം. ഓർഗനൈസേഷൻ ഫോർ ഇക്കണോമിക് കോ-ഓപ്പറേഷൻ ആൻഡ് ഡെവലപ്‌മെൻ്റ് (OECD) നടത്തിയ ടീച്ചിങ് ആൻഡ് ലേണിംഗ് ഇൻ്റർനാഷണൽ സർവേ (TALIS) 2024 റിപ്പോർട്ടിലാണ് ഈ വെളിപ്പെടുത്തൽ. സർവേയിൽ പങ്കെടുത്ത ആൽബർട്ടയിലെ അധ്യാപകരിൽ 42 ശതമാനം പേരും തങ്ങളുടെ ജോലിയിൽ വളരെ അധികം സമ്മർദ്ദം അനുഭവിക്കുന്നതായി റിപ്പോർട്ട് ചെയ്തു. ഇത് ആഗോള ശരാശരിയായ 19 ശതമാനത്തിൻ്റെ ഇരട്ടിയിലധികം വരും.

കാനഡയിൽ അധ്യാപകർക്കിടയിൽ നിലനിൽക്കുന്ന കടുത്ത സമ്മർദ്ദത്തെ ഈ റിപ്പോർട്ട് അടിവരയിടുന്നു. ആഴ്ചയിൽ 47 മണിക്കൂർ വരെ ജോലി ചെയ്യുന്ന ആൽബർട്ടയിലെ അധ്യാപകർ, ലോകത്തിലെ തന്നെ ഏറ്റവും കൂടുതൽ ജോലിഭാരമുള്ളവരിൽ മുൻനിരയിലാണ്. കൂടാതെ, ക്ലാസ് മുറികളിലെ വിദ്യാർത്ഥികളുടെ പലവിധ ആവശ്യങ്ങളും , പ്രത്യേക വിദ്യാഭ്യാസ പിന്തുണ ആവശ്യമുള്ള വിദ്യാർത്ഥികളുടെ വർദ്ധനവും  അധ്യാപകർക്ക് അധിക ഭാരം നൽകുന്നതായും സർവേ എടുത്തു കാണിക്കുന്നു