പുതിയ ഫെഡറൽ ഏജൻസി മേധാവികളുടെ ഉയർന്ന ശമ്പളത്തെ ന്യായീകരിച്ച് പ്രധാനമന്ത്രി മാർക് കാർണി

 

പുതിയ ഫെഡറൽ ഏജൻസി മേധാവികളുടെ ഉയർന്ന ശമ്പളത്തെ ന്യായീകരിച്ച് പ്രധാനമന്ത്രി മാർക് കാർണി. അവരുടെ ഉത്തരവാദിത്തങ്ങളുടെ വ്യാപ്തിക്ക് അനുസരിച്ചാണ് ഉയർന്ന ശമ്പളമെന്ന് അദ്ദേഹം പറഞ്ഞു.  ഏകദേശം  700,000 ഡോളർ ഇവർക്ക് ശമ്പളമായി നല്കുന്നതിനെതിരെ വിമർശനം ഉയർന്നിരുന്നു. 

മേജർ പ്രോജക്ട്‌സ് ഓഫീസിന് ഡോൺ ഫാരെലും, ഡിഫൻസ് ഇൻവെസ്റ്റ്‌മെന്റ് ഏജൻസിക്ക് ഡഗ്ലസ് ഗൂസ്‌മാനുമാണ്  നേതൃത്വം നൽകുന്നത്. ഈ രണ്ട് എക്സിക്യൂട്ടീവുകളും സ്വകാര്യ മേഖലയിൽ നേടിയിരുന്നതിനേക്കാൾ കുറഞ്ഞ ശമ്പളമാണ് ഇപ്പോൾ വാങ്ങുന്നതെന്നും, മറ്റ് ക്രൗൺ കോർപ്പറേഷൻ മേധാവികളുടെ ശമ്പളത്തിന് തുല്യമാണ് ഇവരുടെ ശമ്പളമെന്നും അദ്ദേഹം കൂട്ടിച്ചേർത്തു. ഇരുവർക്കും സിഇഒ-8 റേഞ്ചിലാണ് ശമ്പളം ലഭിക്കുന്നത്, ഇത് ഏകദേശം $573,000 മുതൽ $675,000 വരെയാണ്. കൂടാതെ പ്രകടനത്തിനനുസരിച്ച് 33 ശതമാനം വരെ ബോണസുകളും ലഭിക്കും. തൻ്റെ ആകെ പ്രതിഫലം ഏകദേശം $700,000 ആണെന്ന് ഫാരെൽ എംപിമാരോട് പറഞ്ഞു.

നികുതിദായകരുടെ പണം ഉപയോഗിച്ച് "വൻതോതിലുള്ള" ശമ്പളമാണ് നൽകുന്നതെന്ന വിമർശനവുമായി പ്രതിപക്ഷ നേതാവ് പിയറി പോയിലീവ്രെ രംഗത്തെത്തിയിരുന്നു. ഇതിന് മറുപടിയായി, ഈ രണ്ട് എക്സിക്യൂട്ടീവുകളും പ്രധാന ദേശീയ ഉത്തരവാദിത്തങ്ങളാണ് കൈകാര്യം ചെയ്യുന്നതെന്ന് കാർണി പറഞ്ഞു. തങ്ങളുടെ സ്വകാര്യമേഖലയിലെ വൈദഗ്ദ്ധ്യം പൊതുസേവനത്തിനായി കൊണ്ടുവരുന്നതിൽ അദ്ദേഹം അവരെ പ്രശംസിക്കുകയും ചെയ്തു.