സറേയിൽ ഇന്ത്യൻ റെസ്റ്റോറൻ്റ് ശൃംഖലയ്ക്ക് നേരെ ഒരു ദിവസം രണ്ട് വെടിവെപ്പ് ഉണ്ടായതായി പൊലീസ്

 

കാനഡയിലെ സറേയിൽ ഇന്ത്യൻ റെസ്റ്റോറൻ്റ് ശൃംഖലയ്ക്ക് നേരെ ഒരു ദിവസം രണ്ട് വെടിവെപ്പ് ഉണ്ടായതായി പൊലീസ്.  ലോവർ മെയിൻലാൻഡിലെ ഒരു ഇന്ത്യൻ റെസ്റ്റോറൻ്റ് ശൃംഖലയ്ക്ക് നേരെ  തിങ്കളാഴ്ച ഒരു ദിവസത്തിനിടെ രണ്ടുതവണയാണ് വെടിവെപ്പുണ്ടായത്. ഒരാഴ്ചയ്ക്കിടെ ഉണ്ടായ മൂന്നാമത്തെ ആക്രമണമാണിത്.

പുലർച്ചെ 2:20-ഓടെ കിംഗ് ജോർജ്ജ് ബൊളിവാർഡ്, 156 സ്ട്രീറ്റിന് സമീപമുള്ള 'ഉസ്താദ് ജി76 ഇന്ത്യൻ റെസ്റ്റോറൻ്റിൻ്റെ ഒരു ശാഖയ്ക്ക് നേരെ വെടിവെയ്പ്പ് നടന്നതായി സറേ പോലീസ് സർവീസ് (SPS) അറിയിച്ചു. ഉച്ചയ്ക്ക് ശേഷം ന്യൂടൺ ഏരിയയിലുള്ള 'ഉസ്താദ് ജി76'ൻ്റെ മറ്റൊരു ശാഖയും ആക്രമിക്കപ്പെട്ടു. കടയുടെ ജനലുകളിൽ വെടിയുണ്ടകൾ തുളച്ചുകയറിയതിൻ്റെ പാടുകൾ പോലീസ് പരിശോധിക്കുന്ന ചിത്രങ്ങൾ പുറത്തുവന്നിട്ടുണ്ട്. ഈ വെടിവെപ്പുകളിൽ ആർക്കും പരിക്കേറ്റിട്ടില്ലെങ്കിലും, ഇത് പ്രദേശത്ത് അടുത്തിടെ വർദ്ധിച്ചുവരുന്ന ഭീഷണിപ്പെടുത്തി പണം തട്ടാനുള്ള ശ്രമങ്ങളുമായി ബന്ധപ്പെട്ടാവാമെന്ന് അന്വേഷണ ഉദ്യോഗസ്ഥർ സംശയിക്കുന്നുണ്ട്.

സെപ്റ്റംബർ 27-നും ഉസ്താദ് ജി76 റെസ്റ്റോറൻ്റിൻ്റെ മാപ്പിൾ റിഡ്ജിലുള്ള മറ്റൊരു ശാഖയ്ക്ക് നേരെ വെടിവെപ്പ് നടന്നിരുന്നു. സംഭവങ്ങളെക്കുറിച്ച് എന്തെങ്കിലും വിവരങ്ങൾ ലഭിക്കുന്നവർ അതത് പോലീസ് സ്റ്റേഷനിലോ ക്രൈം സ്റ്റോപ്പേഴ്സിലോ (1-800-222-8477) അറിയിക്കണമെന്ന് പോലീസ് അഭ്യർത്ഥിച്ചു. ദക്ഷിണേഷ്യൻ ഉടമസ്ഥതയിലുള്ള വീടുകൾക്കും ബിസിനസ്സുകൾക്കും നേരെ നടന്നുവരുന്ന അക്രമങ്ങളുമായി ബന്ധപ്പെട്ട് അന്വേഷണം നടത്താൻ ബി.സി. സർക്കാരും ആർ.സി.എം.പി.യും ചേർന്ന് കഴിഞ്ഞ മാസം ഒരു പ്രത്യേക ടാസ്‌ക് ഫോഴ്‌സ് രൂപീകരിച്ചിരുന്നു.