ഡാളസില് അതിക്രൂര മര്ദ്ദനമേറ്റ പിഞ്ചുകുഞ്ഞ് മരിച്ചു; പിതാവിനെതിരെ കൊലക്കുറ്റം
By: 600002 On: Oct 1, 2025, 7:29 AM
പി പി ചെറിയാന്
മെസ്ക്വിറ്റ്(ഡാളസ്): ഗുരുതരമായ പീഡനമേറ്റതിനെ തുടര്ന്ന് ചികിത്സയിലായിരുന്ന പിഞ്ചുകുഞ്ഞ് മരിച്ചു. സംഭവത്തില് കുഞ്ഞിന്റെ പിതാവ് ജോര്ദാന് ഗ്രീറിനെതിരെ (22) പോലീസ് കൊലക്കുറ്റത്തിന് കേസെടുത്തു.
സെപ്റ്റംബര് 18-ന് നോര്ത്ത് വെസ്റ്റ് ഡ്രൈവിലെ 5800-ാം ബ്ലോക്കില് ഒരു കുട്ടിയെ അബോധാവസ്ഥയില് കണ്ടെത്തിയതിനെ തുടര്ന്ന് മെസ്ക്വിറ്റ് പോലീസ് സ്ഥലത്തെത്തി. ഉടന് തന്നെ പോലീസ് കുഞ്ഞിന് പ്രഥമ ശുശ്രൂഷ നല്കി ആശുപത്രിയിലെത്തിച്ചു. കുഞ്ഞിന്റെ ശരീരത്തില് വിവിധ കാലയളവുകളില് സംഭവിച്ച ഒന്നിലധികം പരിക്കുകള് കണ്ടെത്തിയതിനെ തുടര്ന്ന് അന്വേഷണം ആരംഭിച്ചു.
പോലീസ് സത്യവാങ്മൂലം അനുസരിച്ച്, കുഞ്ഞിന് തലയോട്ടിക്ക് പൊട്ടല്, തലച്ചോറില് നീര്ക്കെട്ട്, രക്തസ്രാവം, വിവിധ ഘട്ടങ്ങളില് ഭേദമായ ഒന്നിലധികം വാരിയെല്ലുകള്ക്ക് പൊട്ടല് എന്നിവയുണ്ടായിരുന്നു. ഇത് കടുത്ത ശാരീരിക പീഡനത്തിന്റെ ലക്ഷണങ്ങളാണെന്ന് ഡോക്ടര്മാര് സ്ഥിരീകരിച്ചു.
കുഞ്ഞിന് പരിക്കേറ്റതിനെക്കുറിച്ച് ആദ്യം നിഷേധിച്ച പിതാവ് ജോര്ദാന് ഗ്രീര്, ചോദ്യം ചെയ്യലില് കുഞ്ഞിനെ കുലുക്കുകയും ഒന്നിലധികം തവണ കട്ടിലില് തലയിടിപ്പിക്കുകയും ചെയ്തതായി സമ്മതിച്ചു. കുഞ്ഞിനെ കൈകാര്യം ചെയ്യുന്നതില് അമിതമായ ബലം പ്രയോഗിച്ചതായും കുഞ്ഞ് മരിച്ചോ എന്ന് ഭയന്നിരുന്നതായും ഇയാള് പോലീസിനോട് പറഞ്ഞു.
സെപ്റ്റംബര് 23-ന് കുഞ്ഞ് മരണത്തിന് കീഴടങ്ങി. വിശദമായ അന്വേഷണത്തിനൊടുവില്, പിതാവ് ജോര്ദാന് ഗ്രീറിനെതിരെ കൊലപാതകത്തിന് കേസെടുക്കാന് ആവശ്യമായ തെളിവുകള് മെസ്ക്വിറ്റ് പോലീസ് കണ്ടെത്തി. അന്വേഷണം തുടരുകയാണ്.