എംപ്ലോയിമെൻ്റ് ഇൻഷുറൻസ്  സ്വീകർത്താക്കളുടെ എണ്ണം 13% വർദ്ധിച്ചതായി സ്റ്റാറ്റിസ്റ്റിക്സ് ഓഫ് കാനഡ

 

ജൂൺ മാസത്തിൽ എംപ്ലോയിമെൻ്റ് ഇൻഷുറൻസ്  സ്വീകർത്താക്കളുടെ എണ്ണം ഏകദേശം 13% വർദ്ധിച്ചതായി സ്റ്റാറ്റിസ്റ്റിക്സ് ഓഫ് കാനഡ. എംപ്ലോയിമെൻ്റ് ഇൻഷുറൻസ് സ്വീകർത്താക്കളുടെ എണ്ണം കഴിഞ്ഞ വർഷത്തേക്കാൾ വളരെ വേഗത്തിൽ വർദ്ധിച്ചുകൊണ്ടിരിക്കുകയാണെന്ന് പുതിയ ഡാറ്റ കാണിക്കുന്നു.  ഈ വർഷം കാനഡക്കാർക്ക് സ്ഥിരമായ തൊഴിൽ കണ്ടെത്തുന്നതും നിലനിർത്തുന്നതും കൂടുതൽ ബുദ്ധിമുട്ടായിരിക്കുമെന്നും റിപ്പോർട്ട് പറയുന്നു.

2025 ജൂണിൽ EI ആനുകൂല്യങ്ങൾ ലഭിക്കുന്ന മൊത്തം കനേഡിയൻമാരുടെ എണ്ണം 18,000 വർദ്ധിച്ച് 5,41,000 ആയി.  മുൻ മാസത്തേക്കാൾ 3.4 ശതമാനത്തിൻ്റെ വർധനവാണ് രേഖപ്പെടുത്തിയത്. 2024 ജൂണിനെ അപേക്ഷിച്ച് ഇത് 12.8 ശതമാനം കൂടുതലാണെന്നും സ്റ്റാറ്റിസ്റ്റിക്സ് കാനഡ  റിപ്പോർട്ട് ചെയ്തു. വർഷത്തിലെ ആദ്യ ആറ് മാസങ്ങളിൽ, പുതിയ ഇ.ഐ ഗുണഭോക്താക്കളുടെ എണ്ണം ആകെ 54,000 ആയി ഉയർന്നു. അതായത് 11 ശതമാനം വർധനവുണ്ടായതായും ഏജൻസി റിപ്പോർട്ട് ചെയ്യുന്നു.  ജൂണിലുണ്ടായ വർദ്ധനവിൻ്റെ ഭൂരിഭാഗവും ക്യൂബെക്കിലും ഒൻ്റാരിയോയിലുമാണ് കണ്ടത്.  ആൽബെർട്ട, ന്യൂഫൗണ്ട്‌ലാൻഡ്, ലാബ്രഡോർ, സസ്‌കാച്ചെവൻ എന്നിവിടങ്ങളിലും വർദ്ധനവുണ്ടായി. യുഎസ് പ്രസിഡൻ്റ് ഡൊണാൾഡ് ട്രംപിൻ്റെ താരിഫുകൾ സൃഷ്ടിച്ച വ്യാപാര യുദ്ധത്തിൻ്റെ പശ്ചാത്തലത്തിലാണ് ഈ കണക്കുകൾ പുറത്തുവരുന്നത്. ഉയർന്ന ചെലവുകൾ പോലുള്ള പ്രത്യാഘാതങ്ങളുമായി ബിസിനസ്സ് ഉടമകൾക്ക് പൊരുത്തപ്പെടേണ്ടി വരുന്നുണ്ടെന്നാണ് പുതിയ കണക്കുകൾ സൂചിപ്പിക്കുന്നത്. ഉൽപ്പാദന മേഖലയിൽ വ്യാപാരയുദ്ധം ചില പ്രത്യാഘാതങ്ങൾ സൃഷ്ടിച്ചിട്ടുണ്ടെങ്കിലും, ജൂൺ, ജൂലൈ മാസങ്ങളിൽ  തൊഴിലവസരങ്ങളുടെ എണ്ണം ഉയരാൻ തുടങ്ങിയത് പ്രതീക്ഷ നല്കുന്നുണ്ട്.