കാനഡയിലുടനീളം കടകളില്‍ മോഷണങ്ങള്‍ വര്‍ധിക്കുന്നു: റിപ്പോര്‍ട്ട് 

By: 600002 On: Jul 25, 2025, 11:55 AM

 

കാനഡയിലുടനീളം കുറ്റകൃത്യങ്ങള്‍ കുറഞ്ഞുവെന്ന റിപ്പോര്‍ട്ടുകള്‍ പുറത്തുവന്നെങ്കിലും കടകളില്‍ മോഷണം വര്‍ധിച്ചുകൊണ്ടിരിക്കുകയാണെന്ന് പുതിയ റിപ്പോര്‍ട്ട്. 2024 ല്‍ കാനഡയിലുടനീളമുള്ള കുറ്റകൃത്യങ്ങളുടെ നിരക്ക് 4.1 ശതമാനം കുറഞ്ഞുവെന്ന് കഴിഞ്ഞ ദിവസം പ്രസിദ്ധീകരിച്ച ക്രൈം സെവെറിറ്റി ഇന്‍ഡെക്‌സില്‍(CSI) പറയുന്നു. എങ്കിലും കടകളില്‍ ഉല്‍പ്പന്നങ്ങള്‍ മോഷണം പോകുന്നത് തുടര്‍ക്കഥയാവുകയാണ്. 5,000 ഡോളറോ അതില്‍ കുറവോ വിലയുള്ള സാധനങ്ങളാണ് കടകളില്‍ നിന്നും ഏറ്റവും കൂടുതല്‍ മോഷണം പോകുന്നതെന്നും റിപ്പോര്‍ട്ടില്‍ പറയുന്നു. 

2024 ല്‍ 182,361 കടകളില്‍ മോഷണം നടന്നതായി പോലീസിന് റിപ്പോര്‍ട്ടുകള്‍ ലഭിച്ചു. 2023 നെ അപേക്ഷിച്ച് 14 ശതമാനം വര്‍ധനയാണ് രേഖപ്പെടുത്തിയത്. തുടര്‍ച്ചയായി നാല് വര്‍ഷമായി കടകളില്‍ നിന്നുള്ള മോഷണ നിരക്ക് വര്‍ധിച്ചുകൊണ്ടിരിക്കുകയാണെന്ന് റിപ്പോര്‍ട്ടില്‍ പറയുന്നു. 
കഴിഞ്ഞ ദശകത്തിലെ സ്ഥിതി വിവരക്കണക്കുകള്‍ ആശങ്കപ്പെടുത്തുന്ന പ്രവണതയാണ് സൂചിപ്പിക്കുന്നത്. 2014 മുതല്‍ 2024 വരെ കടകളില്‍ മോഷണം 66 ശതമാനം വര്‍ധിച്ചു. 

മറ്റ് തരത്തിലുള്ള കുറ്റകൃത്യങ്ങളുമായി താരതമ്യപ്പെടുത്തുമ്പോള്‍ കടയില്‍ നിന്ന് മോഷണം നടത്തുന്നത് പൊതുവെ താരതമ്യേന ചെറിയ കുറ്റകൃത്യമായി കണക്കാക്കപ്പെടുന്നു. എങ്കിലും മോഷണം ബിസിനസ് സ്ഥാപനങ്ങള്‍ക്ക് വന്‍ സാമ്പത്തിക നഷ്ടത്തിന് കാരണമാകും. അതിനാല്‍ കച്ചവട സ്ഥാപനങ്ങള്‍ മോഷണം തടയുന്നതിന് കര്‍ശന നടപടിയെടുക്കുന്നുണ്ട്. 

ജനുവരിയില്‍, സോബീസ് ഇന്‍കോര്‍പ്പറേറ്റഡിന്റെ ഉടമസ്ഥതയിലുള്ള സൂപ്പര്‍മാര്‍ക്കറ്റ് ശൃംഖലയായ സേഫ്‌വേ, ആന്റി-തെഫ്റ്റ് ഗേറ്റുകള്‍ സ്ഥാപിച്ചിരുന്നു. എന്നാല്‍ ഇതില്‍ വാന്‍കുവറിലെ ഉപഭോക്താക്കള്‍ നിരാശ പ്രകടിപ്പിച്ചു. കഴിഞ്ഞ വര്‍ഷം, ലോബ്ലോസ് റെസീപ്റ്റ് സ്‌കാനറുകള്‍, സെക്യൂരിറ്റി ഗേറ്റ്‌സ്, ലോക്കിംഗ് വീലുകളുള്ള ഷോപ്പിംഗ് കാര്‍ട്ടുകള്‍ തുടങ്ങി നിരവധി മോഷണ വിരുദ്ധ രീതികള്‍ പരീക്ഷിക്കുകയും ചെയ്തിട്ടുണ്ട്.