ചൂട് കൂടുന്നു; ബീസിയില്‍ ടിക്ക് സീസണ്‍ ആരംഭിച്ചു; ജാഗ്രതാ നിര്‍ദ്ദേശം നല്‍കി അധികൃതര്‍ 

By: 600002 On: Jul 23, 2025, 8:38 AM

 


ബീസിയില്‍ ടിക്ക് സീസണ്‍ ആരംഭിച്ചു. സമ്മര്‍ സീസണില്‍ അനുഭവിക്കുന്ന കടുത്ത ചൂട് ചെള്ളുകള്‍ക്ക് വ്യാപകമായി പെരുകാന്‍ അനുകൂലമാക്കുന്നതായി വിദഗ്ധര്‍ പറയുന്നു. രണ്ട് തരം ചെള്ളുകളാണ് പ്രവിശ്യയിലുടനീളം പെരുകുന്നതെന്ന് ഇന്‍വേസീവ് സ്പീഷീസ് ഓഫ് ബ്രിട്ടീഷ് കൊളംബിയ എക്‌സിക്യുട്ടീവ് ഡയറക്ടര്‍ ഗെയ്ല്‍ വാലിന്‍ പറഞ്ഞു. വെസ്റ്റേണ്‍ ബ്ലാക്ക്‌ലെഗ്ഗ്ഡ് ടിക്ക്, റോക്കി മൗണ്ടെയ്ന്‍ വുഡ് ടിക്ക് എന്നിവയാണ് ബീസിയില്‍ വ്യാപകമാകുന്നത്. വളര്‍ത്തുമൃഗങ്ങളിലാണ് ഇവ കൂടുതലായും കാണപ്പെടുന്നത്. അതിനാല്‍ ടിക്ക് നീക്കം ചെയ്യുമ്പോള്‍ ജാഗ്രത പാലിക്കാന്‍ വളര്‍ത്തുമൃഗ ഉടമകള്‍ക്ക് വാലിന്‍ മുന്നറിയിപ്പ് നല്‍കുന്നു. കൂടാതെ ആന്റി-ടിക്ക് മരുന്നുകള്‍ ഉപയോഗിച്ച് ചെള്ളുകളെ തുരത്താമെന്നും അദ്ദേഹം നിര്‍ദ്ദേശിച്ചു.  

ടിക്കിനെ കണ്ടെത്തി കഴിഞ്ഞാല്‍ eTick എന്ന സൈറ്റില്‍ രജിസ്റ്റര്‍ ചെയ്യാം. ഈ സൈറ്റില്‍ നിന്നും അത് ഏത് തരം ടിക്കാണെന്ന് തിരിച്ചറിയാനും ഇതിനെ എവിടെയാണ് കൂടുതലായി കാണപ്പെടുന്നത് എന്നുള്ള വിവരങ്ങള്‍ അറിയാനും ഈ സൈറ്റിലൂടെ സാധിക്കും. പുല്‍മേടുകളിലും ചെള്ളുകളുണ്ടാകും. അതിനാല്‍ പുറത്ത് പോകുമ്പോള്‍ ഷോര്‍ട്ട്‌സ് ധരിക്കുന്നതിനു പകരം പാന്റ്‌സും ലോംഗ് സ്ലീവ്‌സ് ഉള്ള വസ്ത്രങ്ങളും ധരിക്കേണ്ടതാണെന്നും വാലിന്‍ നിര്‍ദ്ദേശിക്കുന്നു.   

ആരംഭത്തില്‍ തന്നെ ചികിത്സിച്ചില്ലെങ്കില്‍ മനുഷ്യരിലും മൃഗങ്ങളിലും റോക്കി മൗണ്ടെയ്ന്‍ വുഡ് ടിക്ക് പകര്‍ത്തുന്ന റോക്കി മൗണ്ടെയ്ന്‍ സ്‌പോട്ടഡ് ഫീവര്‍ ജീവന് ഭീഷണിയായേക്കാം. പനി, തലവേദന, പേശീവേദന, ചുണങ്ങ് എന്നിവ ഉള്‍പ്പെടെ ലക്ഷണങ്ങള്‍ ഉണ്ടായേക്കാം. ചികിത്സിച്ചില്ലെങ്കില്‍ ഇത് ഗുരുതരമായ ആരോഗ്യ പ്രശ്‌നങ്ങള്‍ക്ക് കാരണമാവുകയും മരണം വരെ സംഭവിക്കാവുന്നതാണെന്നും മുന്നറിയിപ്പില്‍ പറയുന്നു.