സീക്രട്ട് ടാറ്റൂ പാര്‍ലറില്‍ മൂന്ന് യുവതികളെ ബലാത്സംഗം ചെയ്ത കേസില്‍ എഫ്ബിഐ ഏജന്റ് കുറ്റക്കാരനെന്ന് കണ്ടെത്തി
By: 600002 On: Jul 21, 2025, 9:55 AM
സൗജന്യമായി ടാറ്റൂ ചെയ്ത് നല്‍കാമെന്നും മോഡലിംഗ് ഫോട്ടോഷൂട്ട് നടത്താമെന്നും വാഗ്ദാനം ചെയ്ത് സീക്രട്ട് ടാറ്റൂ പാര്‍ലറില്‍ എത്തിച്ച് മൂന്ന് യുവതികളെ ബലാത്സംഗം ചെയ്ത എഫ്ബിഐ ഏജന്റിനെതിരെ കുറ്റം ചുമത്തി. മേരിലാന്‍ഡിലെ ഒരു സ്ട്രിപ്പ് മാളിനുള്ളില്‍ ടാറ്റൂ സ്റ്റുഡിയോ നടത്തിയിരുന്ന ലാലോ ബ്രൗണ്‍ എന്ന വിളിപ്പേരില്‍ അറിയപ്പെട്ടിരുന്ന എഡ്വോര്‍ഡ് വാല്‍ഡിവിയ(41) ആണ് അറസ്റ്റിലായത്.
ബ്രൗണ്‍ എഫ്ബിഐ ഏജന്റ് ആയിരുന്നുവെന്ന് യുവതികള്‍ക്കറിയില്ലെന്നും കേടതി പറഞ്ഞു. എട്ട് ദിവസത്തെ വിചാരണയ്ക്ക് ശേഷം മോണ്ട്‌ഗോമറി കൗണ്ടിയിലെ ജൂറിയാണ് കുറ്റക്കാരനാണെന്ന് കണ്ടെത്തിയത്. 2022 ലാണ് യുവതികളെ ഇയാള്‍ ബലാത്സംഗത്തിന് ഇരകളാക്കിയിരുന്നത്.
18, 20, 21 വയസ് പ്രായമുള്ള മൂന്ന് യുവതികളെയാണ് ഇയാള്‍ ബലാത്സംഗം ചെയ്തത്. കേസുകളില്‍ ഇയാള്‍ക്കെതിരെ സെക്കന്‍ഡ് ഡിഗ്രി കുറ്റം ചുമത്തി. ശിക്ഷ ഒക്ടോബര്‍ 14 ന് വിധിക്കും. ഇയാളെ ബ്യൂറോ സസ്‌പെന്‍ഡ് ചെയ്തു. ഇയാള്‍ക്ക് ടാറ്റൂ പാര്‍ലര്‍ ഉണ്ടായിരുന്ന കാര്യം എഫ്ബിഐയോട് ഇയാള്‍ മറച്ചുവെച്ചിരുന്നു. സോഷ്യല്‍മീഡിയയിലൂടെ ഡിസി ഫൈന്‍ ലൈന്‍ ടാറ്റൂ എന്ന പേരില്‍ മാര്‍ക്കറ്റ് ചെയ്തിരുന്നു. ഈ ചതിക്കുഴിയില്‍ വീണാണ് പെണ്‍കുട്ടികള്‍ ഇയാളുടെ വലയില്‍പ്പെട്ടുപോയത്.