ടെക്‌സസ് വെള്ളപ്പൊക്കം 28 കുട്ടികള്‍ ഉള്‍പ്പെടെ മരണസംഖ്യ 94 ആയി

By: 600002 On: Jul 8, 2025, 8:47 AM



 

പി പി ചെറിയാന്‍, ഡാളസ്

മധ്യ ടെക്‌സാസില്‍ 'ഒരു തലമുറയില്‍ ഒരിക്കല്‍ സംഭവിക്കുന്ന പ്രകൃതി ദുരന്തം' എന്ന് വൈറ്റ് ഹൗസ് വിശേഷിപ്പിച്ച വെള്ളപ്പൊക്കത്തില്‍ 28 കുട്ടികള്‍ ഉള്‍പ്പെടെ കുറഞ്ഞത് 94 പേര്‍ മരിച്ചു. മഹാപ്രളയത്തില്‍ മരിച്ചവരുടെ എണ്ണം ഇനിയും ഉയരുമെന്ന് സംസ്ഥാന അധികൃതര്‍ ഞായറാഴ്ച പറഞ്ഞു. ഗ്വാഡലൂപ്പ് നദിയുടെ തീരത്തുള്ള ഒരു ക്രിസ്ത്യന്‍ സമ്മര്‍ ക്യാമ്പായ ക്യാമ്പ് മിസ്റ്റിക്കില്‍ പങ്കെടുത്ത 10 പെണ്‍കുട്ടികളുടെ ഒരു സംഘത്തിനും ഒരു കൗണ്‍സിലര്‍ക്കുമായി രക്ഷാപ്രവര്‍ത്തകര്‍ ഇപ്പോഴും തിരച്ചില്‍ നടത്തുകയാണെന്ന് കെര്‍ കൗണ്ടി ഷെരീഫ് ലാറി ലീത അറിയിച്ചു.

പൊതുജനങ്ങള്‍ക്ക് അപകടത്തെക്കുറിച്ച് ശരിയായ മുന്നറിയിപ്പ് ലഭിച്ചില്ലെന്ന അവകാശവാദങ്ങള്‍ ഉയരുന്ന സാഹചര്യത്തില്‍, ഈ വെള്ളപ്പൊക്കത്തിന് പ്രസിഡന്റ് ട്രംപിനെ കുറ്റപ്പെടുത്തുന്നത് തെറ്റാണെന്ന് എന്ന് വൈറ്റ് ഹൗസ് പ്രസ് സെക്രട്ടറി കരോലിന്‍ ലീവിറ്റ് മാധ്യമപ്രവര്‍ത്തകരോട് പറഞ്ഞു. കൊടുങ്കാറ്റിന് 12 മണിക്കൂര്‍ മുമ്പ് മുന്നറിയിപ്പുകള്‍ ആരംഭിച്ചതിനെ നാഷണല്‍ വെതര്‍ സര്‍വീസ് (NWS) ന്യായീകരിച്ചു. കൂടാതെ, 'മൂന്ന് മണിക്കൂറില്‍ കൂടുതല്‍ പ്രാഥമിക ലീഡ് സമയം' നല്‍കിയതായും അവര്‍ വ്യക്തമാക്കി.

തിങ്കളാഴ്ച രാവിലെ, 27 ക്യാമ്പംഗങ്ങളും കൗണ്‍സിലര്‍മാരും മരിച്ചതായി ക്യാമ്പ് മിസ്റ്റിക് സ്ഥിരീകരിച്ചു. വെള്ളപ്പൊക്ക ബാധിത പ്രദേശമായ ടെക്‌സാസിലെ കെര്‍വില്ലെയിലെ ലോക്കല്‍ പോലീസ്, പ്രദേശം ഒഴിവാക്കാന്‍ പൊതുജനങ്ങളോട് ആവശ്യപ്പെട്ടു. 'കാര്യങ്ങള്‍ കൂടുതല്‍ വഷളാക്കുന്ന കാഴ്ചക്കാര്‍' രക്ഷാപ്രവര്‍ത്തകര്‍ക്ക് തടസ്സമുണ്ടാക്കിയതായും പോലീസ് പറഞ്ഞു.

തിങ്കളാഴ്ച വൈകുന്നേരം 7 മണിയോടെ 10 ഇഞ്ച് വരെ മഴ പെയ്യാന്‍ സാധ്യതയുള്ളതിനാല്‍ നദികള്‍, അരുവികള്‍, മറ്റ് താഴ്ന്ന പ്രദേശങ്ങള്‍ എന്നിവ വെള്ളപ്പൊക്കത്തിന് സാധ്യതയുണ്ടെന്ന് NWS മുന്നറിയിപ്പ് നല്‍കി.