കാനഡയിൽ വാർഷിക ഭവന നിർമ്മാണ നിരക്ക് ഇരട്ടിയാക്കണമെന്ന് കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ

രാജ്യത്തെ ഭവന നിർമ്മാണ പ്രതിസന്ധി രൂക്ഷമാകുന്നതിന് പിന്നാലെ പുതിയ നിർദ്ദേശവുമായി 
കാനഡ മോർട്ട്ഗേജ് ആൻഡ് ഹൗസിംഗ് കോർപ്പറേഷൻ്റെ പുതിയ റിപ്പോർട്ട്. നിലവിലെ വാർഷിക ഭവന നിർമ്മാണ നിരക്ക് ഇരട്ടിയാക്കിക്കൊണ്ട്, കാനഡ ഭവന നിർമ്മാണത്തിൻ്റെ വേഗത ശക്തമായി വർദ്ധിപ്പിക്കേണ്ടതുണ്ടെന്ന് റിപ്പോർട്ട് പറയുന്നു. 

കാനഡയിലെ ഭവന ലഭ്യതയിലുള്ള കുറവിനെക്കുറിച്ചുള്ള വിശകലനത്തിൽ, 2035 വരെ രാജ്യം പ്രതിവർഷം 430,000 മുതൽ 480,000 വരെ ഭവന യൂണിറ്റുകൾ നിർമ്മിക്കേണ്ടതുണ്ടെന്ന് CMHC കണക്കാക്കുന്നു. പ്രതിവർഷം ഏകദേശം 250,000 യൂണിറ്റുകൾ മാത്രമാണ് നിലവിൽ നിർമ്മിക്കപ്പെടുന്നത്. കൊവിഡിനെ തുടർന്ന് വീട് വിപണിയിലുണ്ടായ കുതിച്ചുചാട്ടത്തിന് മുമ്പ്, 2019ലെ നിലവാരത്തിലേക്ക് വില പുനഃസ്ഥാപിക്കുകയാണ് ലക്ഷ്യം. അഞ്ച് വർഷം മുൻപത്തെ സാഹചര്യങ്ങളുമായി താരതമ്യം ചെയ്യുമ്പോൾ മെട്രോ വാൻകൂവർ, ഗ്രേറ്റർ ടൊറൻ്റോ തുടങ്ങിയ നഗരങ്ങളിൽ, ഇപ്പോൾ വീടുകൾ വാങ്ങുക  ബുദ്ധിമുട്ടായിരിക്കുന്നുവെന്ന് റിപ്പോർട്ട് പറയുന്നു. 2019ൽ, മെട്രോ വാൻകൂവറിൽ ഒരു വീട് വാങ്ങാൻ ആളുകൾക്ക് അവരുടെ വാർഷിക വരുമാനത്തിന്റെ 71 ശതമാനം ആവശ്യമായിരുന്നു. എന്നാൽ 2024 ആയപ്പോഴേക്കും അത് 99 ശതമാനമായി ഉയർന്നു.  ടൊറൻ്റോയിൽ ഇത് 59 ശതമാനത്തിൽ നിന്ന് 74 ശതമാനമായി ഉയർന്നു. നോവ സ്കോഷ്യ, ന്യൂ ബ്രൺസ്‌വിക്ക്, മാനിറ്റോബ എന്നിവിടങ്ങളിലും വീടുകൾ വാങ്ങുകയെന്നത് സാധാരണക്കാർക്ക് ബുദ്ധിമുട്ടായിരിക്കുന്നുവെന്നും റിപ്പോർട്ടിലുണ്ട്. .