വർഷം വെറും 84 ദിവസം ജോലി, ശമ്പളം 66 ലക്ഷം, പക്ഷേ ജീവിതം ബോറടിയെന്ന് പരാതി

 

 

ജീവിതം എന്നും ഒരേ താളത്തിൽ പോകുന്നുവെന്ന് പരാതിപ്പെടുന്നവരാണ് നമ്മളിൽ ഭൂരിഭാഗവും. രാവിലെ എഴുന്നേൽക്കുക, ഭക്ഷണം കഴിക്കുക, ജോലിക്ക് പോവുക, തിരികെ വരുക, ഭക്ഷണം കഴിക്കുക, കിടന്നുറങ്ങുക ഇങ്ങനെയൊരു ജീവിതചക്രം സ്ഥിരമായി പിന്തുടരുന്നവരായിരിക്കും നമ്മുക്കിടയിലെ കൂടുതല്‍ പേരും. ഒന്നാലോചിച്ചാല്‍ നമ്മുടെ ഓരോരുത്തരുടെ ജീവിതവും ഇതില്‍ നിന്നും വ്യത്യസ്തമല്ലെന്ന് കാണാം. ഈ ദിനചര്യ ചക്രത്തിൽ എന്തെങ്കിലുമൊക്കെ മാറ്റങ്ങൾ ഉണ്ടായിരുന്നെങ്കിൽ എന്ന് ആഗ്രഹിക്കാത്തവരും കുറവായിരിക്കും. പക്ഷേ, അങ്ങനെയൊന്ന് എപ്പോൾ സാധ്യമാകും? റെഡ്ഡിറ്റിൽ അടുത്തിടെ പങ്കുവെച്ച ഒരു പോസ്റ്റ് ഇതുമായി ബന്ധപ്പെട്ട വലിയൊരു ചർച്ചയ്ക്കാണ് തുടക്കം കുറിച്ചത്. 

ആ പോസ്റ്റ് പങ്കുവെച്ച വ്യക്തി അവകാശപ്പെട്ടത് എല്ലാ മാസവും ഒരാഴ്ച മാത്രം ജോലി ചെയ്ത് താൻ പ്രതിവർഷം 66 ലക്ഷം രൂപ സമ്പാദിക്കുന്നുണ്ട് എന്നായിരുന്നു. ബാക്കിസമയം മുഴുവൻ ഒന്നും ചെയ്യാതെ നിഷ്ക്രിയമായി സമയം ചെലവഴിക്കുകയാണെന്നും ഇദ്ദേഹം പങ്കുവെച്ചു. ടെലിവിഷൻ കണ്ടും പോഡ്‌കാസ്റ്റുകൾ കേട്ടും സമൂഹ മാധ്യമത്തില്‍ സമയം ചെലവഴിച്ചുമൊക്കെ താൻ സമയത്തെ കൊല്ലുകയാണെന്നാണ് അദ്ദേഹം പറയുന്നത്. വെറും പൊള്ളയായ ഒരു ജീവിതമായാണ് തന്‍റെ ജീവിതത്തെക്കുറിച്ച് തനിക്ക് അനുഭവപ്പെടുന്നതെന്നും ഇദ്ദേഹം കൂട്ടിച്ചേര്‍ക്കുന്നു. തന്‍റെ ജോലി മേഖലയിൽ വർഷങ്ങളുടെ കഠിനാധ്വാനം കൊണ്ട് താൻ നേടിയെടുത്ത പ്രാവീണ്യമാണ് കുറഞ്ഞ സമയം കൊണ്ട് കൂടുതൽ സമ്പാദിക്കാൻ തന്നെ പ്രാപ്തനാക്കിയതെന്നാണ് ഇദ്ദേഹം പറയുന്നത്.