കാനഡയിൽ സ്ഥിര താമസത്തിനുള്ള യോഗ്യതയ്ക്കായി ഫ്രഞ്ച് ഭാഷ പഠിക്കുന്ന കുടിയേറ്റക്കാരുടെ എണ്ണം കൂടുന്നു

കാനഡയിൽ സ്ഥിര താമസത്തിനുള്ള യോഗ്യതയ്ക്കായി കൂടുതൽ കുടിയേറ്റക്കാർ  ഫ്രഞ്ച് ഭാഷ പഠിക്കുന്നു. ഫ്രഞ്ച് പഠിക്കുന്നതിന്  പോയിൻ്റുകൾ ലഭിക്കുന്നുവെന്നും അത് പിആർ ആപ്ലിക്കേഷനിൽ സഹായകരമാകുമെന്ന് അന്താരാഷ്ട്ര വിദ്യാർത്ഥികൾ പറയുന്നു. 

എഞ്ചിനീയറിംഗിൽ ബിരുദാനന്തര ബിരുദത്തിന് 42,000 ഡോളർ ചെലവഴിച്ച ശേഷം, കാനഡയിൽ പിആർ നേടാനായി ഫ്രഞ്ച് പഠിക്കാൻ പല വിദ്യാർത്ഥികളും പ്രതിമാസം 2,000 ഡോളർ വരെയാണ് ചെലവഴിക്കുന്നത്.  ഇപ്പോൾ അന്താരാഷ്ട്ര വിദ്യാർത്ഥികൾക്ക് ഇടയിൽ വർദ്ധിച്ചുവരുന്ന ഒരു പ്രവണതയാണിത്. കുടിയേറ്റ നിയമങ്ങൾ അടക്കം കർശനമാക്കിയതോടെ പിആർ നേടാനുള്ള ശ്രമം കഠിനമായിക്കൊണ്ടിരിക്കുകയാണ്. ജനുവരിയിലെ കണക്കനുസരിച്ച്, കാനഡയിൽ 3.02 ദശലക്ഷം താൽക്കാലിക താമസക്കാരുണ്ടെന്നാണ് കണക്ക്.  എന്നാൽ ഈ വർഷം 395,000 പേർക്ക് മാത്രമെ പിആർ  ലഭ്യമാകൂ. അതുകൊണ്ടാണ് ഫ്രഞ്ച് പഠിക്കാനുള്ള തിരക്ക് കൂടുന്നത് എന്ന് വിദ്യാർത്ഥികൾ   പറയുന്നു. 

സിആർഎസ് അഥവാ കോംപ്രഹെൻസീവ് റാങ്കിങ് സിസ്റ്റം എന്ന സംവിധാനം വഴിയാണ് പെർമെനൻ്റ് റസിഡൻസിക്ക് അപേക്ഷിക്കുന്നവരിൽ നിന്ന് തെരഞ്ഞെടുക്കുന്നത്. പ്രായം, വിദ്യാഭ്യാസ നിലവാരം, ഇംഗ്ലീഷ് പ്രാവീണ്യം, ജോലി പരിചയം തുടങ്ങിയ ഘടകങ്ങൾ കണക്കിലെടുത്താണ് റാങ്കിങ് നിശ്ചയിക്കുക. ഫ്രഞ്ച് ഒരു രണ്ടാം ഭാഷയായി പഠിക്കുകയാണെങ്കിൽ,  CRS പോയിന്റുകൾ വർദ്ധിപ്പിക്കാൻ കഴിയുമെന്നാണ് ഈ രംഗത്തെ പ്രവർത്തിക്കുന്നവർ പറയുന്നത്. അത് പി ആർ ലഭിക്കാനുള്ള  സാധ്യത വർദ്ധിപ്പിക്കുകയും ചെയ്യുന്നു.