എക്സിനെ സ്വന്തം ആർട്ടിഫിഷ്യൽ ഇൻ്റലിജൻസ് കമ്പനിയായ എക്സ്എഐക്ക് വിറ്റ് എലോൺ മസ്ക്

 

തൻ്റെ സോഷ്യൽ മീഡിയ പ്ലാറ്റ്‌ഫോമായ എക്സിനെ സ്വന്തം ആർട്ടിഫിഷ്യൽ ഇൻ്റലിജൻസ് കമ്പനിയായ എക്സ്എഐക്ക് വിറ്റ് എലോൺ മസ്ക്. 33 ബില്യൺ ഡോളറിൻ്റെ ഓൾ-സ്റ്റോക്ക് ഡീലിലൂടെയായിരുന്നു വില്പന. എക്സ്എഐക്ക് 80 ബില്യൺ ഡോളറും എക്സിന് 33 ബില്യൺ ഡോളറും മൂല്യം കണക്കാക്കിയാണ്  മസ്‌കിൻ്റെ പുതിയ നീക്കം.  2022ൽ 44 ബില്യൺ ഡോളറിനാണ് ട്വിറ്റർ എന്നറിയപ്പെട്ടിരുന്ന എക്സിനെ മസ്‌ക് സ്വന്തമാക്കിയത്. 

എഐ രംഗത്ത് കൂടുതൽ ശ്രദ്ധ കേന്ദ്രീകരിക്കാനാണ് മസ്‌കിൻ്റെ ലക്ഷ്യം. എക്സ്എഐയെ ഒപ്പൺഎഐ, ഗൂഗിൾ ഡീപ്പ് മൈൻഡ്, ആന്ത്രോപിക് തുടങ്ങിയ കമ്പനികളുമായി മത്സരിപ്പിക്കാൻ ഈ നീക്കം സഹായിക്കും. എക്സിൽ ഗ്രോക്ക് എഐയുടെയും മറ്റ് എഐ സൗകര്യങ്ങളുടെയും കൂട്ടിച്ചേർക്കലുകൾ ഉണ്ടാകാൻ സാധ്യതയുണ്ട്. ടെസ്‌ല, സ്പേസ് എക്സ്, ന്യൂറാലിങ്ക്, ദ് ബോറിംഗ് കമ്പനി തുടങ്ങിയ നിരവധി കമ്പനികളുടെ തലവനാണ് ഇലോൺ മസ്‌ക്. പുതിയ ഡീലിലൂടെ എഐ രംഗത്ത് കൂടുതൽ സ്വാധീനം ചെലുത്താൻ മസ്‌കിന് സാധിച്ചേക്കും. എക്സ് എഐയുടെയും എക്സിന്റെയും ഭാവി പരസ്പരം ബന്ധപ്പെട്ടിരിക്കുകയാണെന്ന് മസ്ക് വ്യക്തമാക്കി. ഡാറ്റ, മോഡലുകൾ, വിതരണം, കഴിവ് എന്നിവ ഒരുമിപ്പിക്കാനുള്ള ശ്രമങ്ങൾ ഔദ്യോഗികമായി ആരംഭിച്ചിട്ടുണ്ട്.