മോഷ്ടിക്കപ്പെട്ട കാറുകൾ കണ്ടെത്താൻ സഹായിക്കുന്ന പുതിയ സംവിധാനവുമായി സി ബി എസ് എ

 

കാനഡയിൽ മോഷ്ടിച്ച കാറുകൾ കൂടുതൽ ഡീലർഷിപ്പുകളിൽ എത്തുന്നതായി സിബിഎസ്എയുടെ പുതിയ ഡാറ്റ. ഇത് തടയുന്നതിനായി പുതിയൊരു സംവിധാനവും സിബിഎസ്എ മുന്നോട്ട് വച്ചു. ഇതനുസരിച്ച് CARFAX, Elquite അസോസിയേഷൻ എന്നിവയുമായി വാഹനങ്ങളുടെ കയറ്റുമതി വിവരങ്ങൾ പങ്കിടാൻ തുടങ്ങിയിട്ടുണ്ട്. മോഷ്ടിക്കപ്പെട്ട കൂടുതൽ കാറുകൾ കണ്ടെത്തുവാൻ ഇതുവഴി കഴിയുന്നു വെന്നും സി ബി എസ് എ പറയുന്നു. 

വാഹന ചരിത്ര റിപ്പോർട്ടുകൾ നൽകുന്ന കമ്പനിയാണ് CARFAX. ലാഭേച്ഛയില്ലാതെ പ്രവർത്തിക്കുന്ന ഇൻഷുറൻസ് തട്ടിപ്പ് നിരീക്ഷണ സ്ഥാപനമാണ് Équité അസോസിയേഷൻ. ഈ രണ്ട് സ്ഥാപനങ്ങളും CBSA ഡാറ്റ എങ്ങനെ ഉപയോഗിക്കുമെന്ന് കൃത്യമായി വ്യക്തമല്ല. എങ്കിലും മോഷ്ടിച്ച വാഹനങ്ങൾ പിടിക്കുന്നതിൽ പുരോഗതിയുണ്ടാകുമെന്നാണ്  റിപ്പോർട്ട്. നിയമപരമായി കയറ്റുമതി ചെയ്യുന്ന വാഹനങ്ങളിലെ വെഹിക്കിൾ ഐഡന്റിഫിക്കേഷൻ നമ്പറുകൾ കുറ്റവാളികൾ വളരെയധികം ദുരുപയോഗം ചെയ്യുന്നുണ്ടെന്ന് വിദഗ്ദ്ധർ പറയുന്നു. ഡാഷ്‌ബോർഡ് ഉൾപ്പെടെ പല സ്ഥലങ്ങളിലും കാണപ്പെടുന്ന  സീരിയൽ നമ്പർ ക്ലോൺ ചെയ്ത് കാനഡയിലെ മോഷ്ടിച്ച വാഹനത്തിൽ ഒട്ടിക്കുന്നു. ഇത് റീ-വിനിംഗ് എന്നും അറിയപ്പെടുന്നു. 

ഒരു വാഹനം കയറ്റുമതി ചെയ്തിട്ടുണ്ടോ എന്ന് പരിശോധിക്കാൻ ഡീലർമാർക്കോ വാങ്ങുന്നവർക്കോ പ്രവിശ്യാ മന്ത്രാലയങ്ങൾക്കോ ​​ഒരു മാർഗവുമില്ലാത്തതിനാൽ ചില മോഷ്ടിച്ച വാഹനങ്ങൾ കണ്ടെത്താനാകാതെ പോകുന്നു. കയറ്റുമതി ചെയ്ത VIN വിവരങ്ങൾ ലഭ്യമാക്കണമെന്ന് ഒന്റാറിയോയിലെ യൂസ്ഡ് കാർ ഡീലേഴ്സ് അസോസിയേഷൻ ഒരു വർഷത്തിലേറെയായി CBSA-യോട് അഭ്യർത്ഥിച്ചുവരികയാണ്. CARFAX-മായി ഡാറ്റ പങ്കിടുന്നത് ഒരു നല്ല തുടക്കമാണെന്ന് സംഘടനയുടെ എക്സിക്യൂട്ടീവ് ഡയറക്ടർ പറയുന്നു.