കാലിഫോര്ണിയ: മെറ്റയുടെ ജനപ്രിയ മെസേജിംഗ് പ്ലാറ്റ്ഫോമായ വാട്സ്ആപ്പില് പുത്തന് അപ്ഡേറ്റ് വരുന്നു. വാട്സ്ആപ്പ് സ്റ്റാറ്റസ് അപ്ഡേറ്റുകളില് ചിത്രങ്ങള്ക്കൊപ്പം സംഗീതം/ട്യൂണ് ചേര്ക്കാന് കഴിയുന്ന പുതിയ ഫീച്ചര് ഉടന് എത്തും. ഇതിന്റെ പരീക്ഷണം മെറ്റ വാട്സ്ആപ്പ് ബീറ്റ വേര്ഷനില് ആരംഭിച്ചതായാണ് വാബീറ്റ ഇന്ഫോയുടെ റിപ്പോര്ട്ട്.
ഇന്സ്റ്റ സ്റ്റോറിയിലെ പോലെ ഒരു പാട്ടിലെയോ ട്യൂണിലേയോ നിങ്ങള്ക്ക് ഇഷ്ടമുള്ള ഭാഗം മാത്രം സെലക്ട് ചെയ്ത് സ്റ്റാറ്റസില് ചേര്ക്കാനും സാധിക്കും. ഒരു ഫോട്ടോയ്ക്കൊപ്പം ഇത്തരത്തില് മ്യൂസിക് ട്രാക്ക് ചേര്ക്കുമ്പോള് 15 സെക്കന്ഡ് ദൈര്ഘ്യമാണ് പരമാവധി ലഭിക്കുക. അതേസമയം വീഡിയോ സ്റ്റാറ്റസുകളുടെ ദൈര്ഘ്യത്തില് വ്യത്യാസമുണ്ടാവില്ല. സമീപകാലത്ത് ഏറെ പുത്തന് അപ്ഡേറ്റുകള് അവതരിപ്പിച്ച് വാട്സ്ആപ്പിനെ കൂടുതല് യൂസര്-ഫ്രണ്ട്ലി ആക്കാനുള്ള മെറ്റയുടെ ശ്രമത്തിന്റെ ഭാഗമായാണ് പുതിയ നീക്കവും.