2025 ല് ഈ ഫോണുകളില് വാട്സ്ആപ്പ് ഉണ്ടാകില്ല
By: 600002 On: Dec 30, 2024, 10:00 AM
പുതിയ വര്ഷത്തില് കിറ്റ്കാറ്റ് ഓപ്പറേറ്റിംഗ് സിസ്റ്റമോ(OS) അല്ലെങ്കില് പഴയ പതിപ്പുകളോ പ്രവര്ത്തിക്കുന്ന ആന്ഡ്രോയിഡ് ഫോണുകളില് 2025 ജനുവരി 1 മുതല് വാട്സ്ആപ്പ് ലഭ്യമാകില്ലെന്ന് റിപ്പോര്ട്ട്. ഒരു കാലത്ത് പ്രതാപകാരികളായിരുന്ന സാംസങ് ഗാലക്സി എസ്3, എച്ച്ടിസി വണ് എക്സ് തുടങ്ങിയ ഫോണുകളില് നിന്നെല്ലാം വാട്സ്ആപ്പ് പുതുവത്സര ദിനത്തില് അപ്രത്യക്ഷമാകും. വാട്സ്ആപ്പിലേക്ക് മെറ്റ അവതരിപ്പിച്ചുകൊണ്ടിരിക്കുന്ന അനവധി പുത്തന് ഫീച്ചറുകള് പഴയ ആന്ഡ്രോയ്ഡ് വേര്ഷനുകളില് പ്രവര്ത്തിക്കില്ല എന്നതാണ് അത്തരം ഫോണുകളില് വാട്സ്ആപ്പ് ലഭിക്കുന്നത് അവസാനിപ്പിക്കുന്നതിനുള്ള കാരണം. എഐ സാങ്കേതികവിദ്യയിലുള്ള മെറ്റ എഐ അടക്കം അടുത്തിടെ വാട്സ്ആപ്പ് അവതരിപ്പിച്ചിരുന്നു.
സാംസങ് ഗ്യാലക്സി എസ്3, സാംസങ് ഗ്യാലക്സി നോട്ട് 2, സാംസങ് ഗ്യാലക്സി എസ്4 മിനി, മോട്ടോറോള മോട്ടോ ജി (ഒന്നാം ജനറേഷന്), മോട്ടോറോള റേസര് എച്ച്ഡി, മോട്ടോ ഇ 2014, എച്ച്ടിസി വണ്, എച്ച്ടിസി വണ് എക്സ്+, എച്ച്ടിസിഡിസൈര് 500, എച്ച്ടിസിഡിസൈര് 601, എല്ജി ഒപ്റ്റിമസ് ജി, എല്ജി നെക്സസ് 4, എല്ജി ജി2 മിനി, എല്ജി എല്90, സോണി എക്സ്പീരിയ സ്സെഡ്, സോണി എക്സ്പീരിയ എസ്പി, സോണി എക്സ്പീരിയ ടി, സോണി എക്സ്പീരിയ വി എന്നീ ഫോണുകളില് പുതിയ വര്ഷം മുതല് വാട്സ്ആപ്പ് ലഭിക്കില്ല.
2013 ല് അവതരിപ്പിച്ച ഓപ്പറേറ്റിംഗ് സിസ്റ്റമാണ് ആന്ഡ്രോയ്ഡ് കിറ്റ്കാറ്റ്. ഈ ഓപ്പറേറ്റിംഗ് സിസ്റ്റത്തിനുള്ള പിന്തുണ ഗൂഗിള് ഈ വര്ഷം ആദ്യം അവസാനിപ്പിച്ചിരുന്നു. ഐഒഎസ് 15.1 മുതല് പിന്നോട്ടുള്ള ഐഫോണുകളിലെ വാട്സ്ആപ്പിന്റെ പ്രവര്ത്തനവും 2025 ല് അവസാനിക്കും. എന്നാല് ഇതിന് 2025 മെയ് 5 വരെ സമയമുണ്ട്.