ട്രംപിൻ്റെ സ്ഥാനാരോഹണ ചടങ്ങുകൾക്ക് സംഭാവനകളുമായി ഓട്ടോ കമ്പനികൾ

യുഎസ് പ്രസിഡൻ്റ് ഡോണൾഡ് ട്രംപിൻ്റെ സ്ഥാനാരോഹണ ചടങ്ങുകൾക്ക് വടക്കേ അമേരിക്കയിലെ ടൊയോട്ട ഒരു മില്യൺ ഡോളർ സംഭാവന ചെയ്യുന്നു. ഡെട്രോയിറ്റിൻ്റെ ഫോർഡ് മോട്ടോറും ജനറൽ മോട്ടോഴ്‌സും ഇതേ തുക സംഭാവന നൽകുമെന്ന് അറിയിച്ചതിന് തൊട്ടു പിന്നാലെയാണ് ടൊയോട്ടയുടെ വടക്കെ അമേരിക്കൻ വിഭാഗവും സംഭാവന വാഗ്ദാനം ചെയ്തത്.അതേസമയം ടൊയോട്ട വാഹനങ്ങൾ നൽകാൻ  പദ്ധതിയിടുന്നില്ലെന്ന് ജപ്പാൻ ആസ്ഥാനമായുള്ള കമ്പനി അറിയിച്ചു.

ആമസോണും ഫേസ്ബുക്ക് പാരൻ്റ് മെറ്റാ പ്ലാറ്റ്‌ഫോമുകളും ഉൾപ്പെടെയുള്ള മറ്റ് വലിയ കമ്പനികളും ചടങ്ങിന് സംഭാവന നൽകിയിട്ടുണ്ട്. മെക്സിക്കോയിൽ നിന്നും കാനഡയിൽ നിന്നുമുള്ള ഇറക്കുമതിക്ക് ട്രംപ് നിർദ്ദേശിച്ച താരിഫ് നടപ്പിലായാൽ മെക്സിക്കോയിൽ നിർമ്മിക്കപ്പെടുന്ന ടൊയോട്ട ടകോമ പിക്കപ്പ് ട്രക്ക് ഉൾപ്പെടെ വടക്കേ അമേരിക്കയിലെ നിരവധി വാഹന നിർമ്മാതാക്കളെ ബാധിക്കും. ഇലക്‌ട്രിക് വാഹനങ്ങളുമായി ബന്ധപ്പെട്ട ജോ ബൈഡൻ്റെ നയങ്ങളും പുനപരിശോധിക്കാൻ ട്രംപ്  ലക്ഷ്യമിടുന്നതായി റോയിട്ടേഴ്‌സ് റിപ്പോർട്ട് ചെയ്തു.