ആല്ബെര്ട്ടയില് ഇനി ഊബര് ഈറ്റ്സ് വഴി കാനബീസും
By: 600002 On: Jul 31, 2024, 11:07 AM
ആല്ബെര്ട്ടയില് ഇനിമുതല് ഭക്ഷണങ്ങള്ക്കും പാനീയങ്ങള്ക്കും മറ്റ് അവശ്യവസ്തുക്കള്ക്കുമൊപ്പം കാനബീസും ഓര്ഡര് ചെയ്യാം. ചൊവ്വാഴ്ച മുതല് ഉപയോക്താക്കള്ക്ക് ഊബര് ഈറ്റ്സ് വഴി കാനബീസ് ലഭ്യമായി തുടങ്ങി. ഒന്റാരിയോയ്ക്കും ബ്രിട്ടീഷ് കൊളംബിയയ്ക്കും ശേഷം ഓണ്ലൈന് ഓര്ഡര് വഴി കാനബീസ് ലഭ്യമാക്കുന്ന പ്രവിശ്യയാണ് ആല്ബെര്ട്ട. 2022 ല് ഒന്റാരിയോയും 2023 ല് ബീസിയും ഊബര് ഈറ്റ്സ് വഴി കാനബീസ് ഓര്ഡര് ചെയ്യാന് അനുവാദം നല്കിയിരുന്നു.
അതേസമയം, ഉപയോക്താവിന് കാനബീസ് വിതരണം ചെയ്യാന് ജീവനക്കാര്ക്ക് ലൈസന്സും പരിശീലനവും ഉറപ്പാക്കുമെന്ന് ഊബര് കാനഡ വക്താവ് കീര്ത്തി രംഗ് പറഞ്ഞു. കൂടാതെ ഉപയോക്താക്കള് കഞ്ചാവ് ഓര്ഡര് ചെയ്യുമ്പോള് ഊബര് ഈറ്റ്സ് ആപ്പില് അവരുടെ പ്രായം കൃത്യമായി രേഖപ്പെടുത്തണം. ഒപ്പം ഡെലിവറി സമയത്ത് ഊബര് ഈറ്റ്സ് ജീവനക്കാരെ ഉപയോക്താക്കള് തങ്ങളുടെ തിരിച്ചറിയല് രേഖ കാണിക്കുകയും വേണം.