ന്യൂസിലന്‍ഡിലെ ഈ വർഷത്തെ വൃക്ഷ പുരസ്കാരം 105 അടി ഉയരമുള്ള 'നടക്കുന്ന മര'ത്തിന്
By: 600007 On: Jun 18, 2024, 10:10 AMകുട്ടികളില്‍ ഏറെ ആവേശമുയര്‍ത്തിയ ഹോളിവുഡ് സിനിമ 'ലോഡ് ഓഫ് ദി റിംഗ്സി'ല്‍ നടക്കുന്ന, സംസാരിക്കുന്ന മരങ്ങളും കഥാപാത്രങ്ങളാണ്. സിനിമയിലെ കഥാപാത്ര മരങ്ങളെ അനുസ്മരിപ്പിക്കുന്ന ഒരു മരമുണ്ട് അങ്ങ് ന്യൂസിലന്‍ഡില്‍. ഈ വര്‍ഷത്തെ ന്യൂസിലന്‍ഡിന്‍റെ 'വൃക്ഷ പുരസ്കാരം' നേടിയത് ഈ മരമാണ്. 'നടക്കുന്ന മര'മെന്നാണ് (walking tree) ഈ വൃക്ഷം അറിയപ്പെടുന്നത്. ഒരു വയലിലൂടെ നടക്കുന്നതുപോലെ തോന്നിക്കുന്നതിനാലാണ് ഈ പേരില്‍ മരം അറിയപ്പെടുന്നത്. മെട്രോസിഡെറോസ് റോബസ്റ്റ (Metrosideros robusta) എന്ന ശാസ്ത്രീയനാമത്തില്‍ അറിയപ്പെടുന്ന വടക്കൻ റാറ്റ (northern rata) മരമാണിത്. ന്യൂസിലന്‍ഡിലെ ഏറ്റവും ഉയരം കൂടിയ പൂക്കള്‍ പിടിക്കുന്ന വൃക്ഷമായ ഇവയ്ക്ക് 1000 വര്‍ഷം വരെ ജീവിക്കാന്‍ കഴിയും.
സൗത്ത് ഐലൻഡിന്‍റെ പടിഞ്ഞാറൻ തീരത്ത് കരാമിയയ്ക്ക് സമീപമുള്ള ഒരു സെമിത്തേരിക്ക് അടുത്തുള്ള ഒരു വലിയ പറമ്പിന്‍റെ നടുവിലായി ഈ മരം ഒറ്റയ്ക്ക് നില്‍ക്കുന്നു. ഏകദേശം 105 അടി (32 മീറ്റർ) ഉയരമുള്ള മരത്തിന്‍റെ നില്പ്, ഒരു കാല്‍ മുന്നിലും മറുകാല്‍ പിന്നിലുമായി നടക്കുന്നത് പോലെയാണ്. ന്യൂസിലന്‍ഡ് ട്രീ രജിസ്‌റ്റർ പ്രകാരം ഏഴ് നിലകളുള്ള കെട്ടിടത്തിന്‍റെ ഉയരം. ന്യൂസിലന്‍ഡ് അർബോറികൾച്ചറൽ അസോസിയേഷനാണ് 2024 -ലെ ട്രീ ഓഫ് ദ ഇയർ അവാർഡ് പ്രഖ്യാപിച്ചത്. മറ്റ് അഞ്ച് മരങ്ങള്‍ കൂടി മത്സരരംഗത്തുണ്ടായിരുന്നെങ്കിലും മൊത്തം വോട്ടിന്‍റെ 42 ശതമാനവും നേടി 'നടക്കുന്ന മരം' അവാര്‍ഡിന് അര്‍ഹമായി.