ധാക്കയിൽ വിശ്വ ഹിന്ദി ദിവസ് ആഘോഷിച്ചു

ധാക്കയിൽ വിശ്വ ഹിന്ദി ദിവസ് ആഘോഷിച്ചു. ധാക്ക സർവകലാശാലയിൽ നടന്ന വിശ്വ ഹിന്ദി ദിവസ് ആഘോഷത്തിൽ ബംഗ്ലാദേശിലെ ഇന്ത്യൻ ഹൈക്കമ്മീഷണർ പ്രണയ് വർമ പങ്കെടുത്തു. പരസ്‌പരം സംസ്‌കാരത്തെ അഭിനന്ദിക്കുന്ന ആളുകളിലേക്ക് ഭാഷ അതിൻ്റെ വഴി കണ്ടെത്തുന്നുവെന്നും അതാണ് ഭാഷയുടെ അന്തസത്തയെന്നും ചടങ്ങിൽ സംസാരിച്ച വർമ പറഞ്ഞു. ഹിന്ദി ഭാഷ ഒരു മാധ്യമം മാത്രമാണെന്നും എന്നാൽ നമ്മുടെ രണ്ട് സമൂഹങ്ങൾ തമ്മിലുള്ള ബന്ധമെന്ന നിലയിൽ ഭാഷയുടെ പ്രാധാന്യം നമ്മൾ യഥാർത്ഥത്തിൽ ആഘോഷിക്കുകയാണെന്നും അദ്ദേഹം പറഞ്ഞു. ഈ അവസരത്തിൽ പ്രധാനമന്ത്രി നരേന്ദ്ര മോദിയുടെ പ്രത്യേക സന്ദേശം ഹൈക്കമ്മീഷണർ വായിച്ചു. ഹിന്ദി ഭാഷയുടെ ഏറ്റവും വലിയ ശക്തി അതിൻ്റെ മൗലികതയും ലാളിത്യവുമാണെന്നും അതുമൂലം പല രാജ്യങ്ങളിലും ഹിന്ദി ഭാഷയുടെ ഉപയോഗം വർധിച്ചിട്ടുണ്ടെന്നും അദ്ദേഹം പറഞ്ഞു. ലോക ഹിന്ദി ദിനാചരണത്തിൻ്റെ ഭാഗമായി ധാക്ക സർവകലാശാലയിലെ ഇൻസ്റ്റിറ്റ്യൂട്ട് ഓഫ് മോഡേൺ ലാംഗ്വേജിൽ നടന്ന ഹിന്ദി ഭാഷയുമായി ബന്ധപ്പെട്ട വിവിധ പ്രവർത്തനങ്ങളിലെ വിജയികൾക്കുള്ള സമ്മാനങ്ങൾ വിതരണം ചെയ്തു. ധാക്ക സർവകലാശാല വൈസ് ചാൻസലർ ഡോ. മക്‌സുദ് കമലും ചടങ്ങിൽ പങ്കെടുത്തു. ധാക്കയിലെ ഇന്ത്യൻ ഹൈക്കമ്മീഷനിലെ ഇന്ദിരാഗാന്ധി കൾച്ചറൽ സെന്റർ (IGCC) യുടെ ആഭിമുഖ്യത്തിൽ ഹിന്ദി ഭാഷയുടെയും സംസ്കാരത്തിൻ്റെയും സമ്പന്നത പ്രദർശിപ്പിക്കുന്ന സാംസ്കാരിക പരിപാടിയും ഈ അവസരത്തിൽ സംഘടിപ്പിച്ചു.