വിശാഖപട്ടണത്ത് ചാരവൃത്തിക്കേസിലെ പ്രതിയെ അറസ്റ്റ് ചെയ്ത് എൻഐഎ

പാകിസ്ഥാൻ ഐഎസ്‌ഐ ചാരശൃംഖല വഴി രഹസ്യ പ്രതിരോധ വിവരങ്ങൾ ചോർത്തിയെന്ന ചാരവൃത്തി കേസിൽ വിശാഖപട്ടണത്ത് ഒരു പ്രതിയെ കൂടി ദേശീയ അന്വേഷണ ഏജൻസി അറസ്റ്റ് ചെയ്തു. അമൻ സലിം ഷെയ്ഖ് എന്ന വ്യക്തി കൂടി മുംബൈയിൽ നിന്ന് അറസ്റ്റിലായതോടെ ആകെ അറസ്റ്റിലായവരുടെ എണ്ണം മൂന്നായി. റാക്കറ്റിൽ ഉൾപ്പെട്ട പാകിസ്ഥാൻ ഇന്റലിജൻസ് ഉദ്യോഗസ്ഥർ ഉപയോഗിച്ചിരുന്ന സിം കാർഡുകൾ സജീവമാക്കുന്നതിൽ അമൻ ഉൾപ്പെട്ടിട്ടുണ്ടെന്ന് ഔദ്യോഗിക പത്രക്കുറിപ്പിൽ പറയുന്നു. മുംബൈയിലെ രണ്ട് സ്ഥലങ്ങളിലും അസമിലെ ഹൊജായിയിലും നടത്തിയ റെയ്ഡിൽ നാല് മൊബൈൽ ഫോണുകളും നിരവധി തന്ത്രപ്രധാനമായ രേഖകളും എൻഐഎ പിടിച്ചെടുത്തു.അന്വേഷണം തുടരുകയാണെന്നും അമനെ കസ്റ്റഡിയിലെടുത്താൽ ഗൂഢാലോചനയിൽ കൂടുതൽ സൂചനകൾ ലഭിക്കുമെന്നും എൻഐഎ അറിയിച്ചു.