ഉത്തരകാശിയിൽ ടണൽ തകർന്നു; കുടുങ്ങിയ തൊഴിലാളികൾക്കായുള്ള രക്ഷാപ്രവർത്തനം പുരോഗമിക്കുന്നു

ഉത്തരാഖണ്ഡിൽ, ഉത്തരകാശി ജില്ലയിൽ നിർമ്മാണത്തിലിരിക്കുന്ന തുരങ്കം തകർന്നു. ആളപായമില്ല. അവശിഷ്ടങ്ങൾക്കിടയിൽ കുടുങ്ങിയ 30 ലേറെ തൊഴിലാളികൾക്കായുള്ള ദുരിതാശ്വാസ, രക്ഷാപ്രവർത്തനം പുരോഗമിക്കുകയാണെന്ന് ഉത്തരകാശി പോലീസ് സൂപ്രണ്ട് അർപൺ യദുവൻഷി പറഞ്ഞു. തുരങ്കത്തിൽ കുടുങ്ങിയ തൊഴിലാളികൾക്ക് ആവശ്യമായ ഓക്സിജൻ വിതരണം ചെയ്തിട്ടുണ്ടെന്നും സംസ്ഥാന ദുരന്ത നിവാരണ സേന, ദേശീയ ദുരന്ത നിവാരണ സേന, ഇന്തോ-ടിബറ്റൻ ബോർഡർ പോലീസ്, പോലീസ് സേന, തുടങ്ങിയവർ തുരങ്കത്തിലെ അവശിഷ്ടങ്ങൾ നീക്കം ചെയ്യാൻ കനത്ത യന്ത്രങ്ങൾ എന്നിവ സ്ഥലത്ത് വിന്യസിച്ചിട്ടുണ്ടെന്നും യദുവൻഷി പറഞ്ഞു. ഉത്തരകാശിയിലെ ബ്രഹ്മഖൽ-യമുനോത്രി ദേശീയപാതയിൽ സിൽക്യാര മുതൽ ദണ്ഡൽഗാവ് വരെയുള്ള നിർമാണത്തിലിരിക്കുന്ന തുരങ്കത്തിൻ്റെ 50 മീറ്ററോളം ഇടിഞ്ഞ് താഴ്ന്നതിനെ തുടർന്നാണ് ഇന്ന് രാവിലെ അപകടമുണ്ടായത്.അതേസമയം, തുരങ്കത്തിൽ കുടുങ്ങിയ തൊഴിലാളികൾക്ക് സഹായം നൽകുമെന്ന് പ്രധാനമന്ത്രി നരേന്ദ്രമോദി അറിയിച്ചു.ഉത്തരാഖണ്ഡ് മുഖ്യമന്ത്രി പുഷ്കർ സിംഗ് ധാമിയുമായി ഫോണിൽ സംസാരിച്ച് തുരങ്കത്തിൽ കുടുങ്ങിയ തൊഴിലാളികളുടെ അവസ്ഥയെക്കുറിച്ച് ചോദിച്ചറിഞ്ഞു. ദുരിതാശ്വാസ പ്രവർത്തനങ്ങളിലും രക്ഷാപ്രവർത്തനങ്ങളിലും സഹകരിക്കാൻ കേന്ദ്ര ഏജൻസികൾക്ക് കേന്ദ്ര സർക്കാർ ഇതിനകം നിർദേശം നൽകിയിട്ടുണ്ട്.