ന്യൂസിലൻഡിനെതിരായ ലോകകപ്പ് മത്സരത്തിൽ ഇന്ത്യക്ക് ജയം; ഇന്ത്യൻ ടീമിനെ അഭിനന്ദിച്ച് പ്രധാനമന്ത്രി

ന്യൂസിലൻഡിനെതിരായ ലോകകപ്പ് മത്സരത്തിൽ വിജയിച്ച ഇന്ത്യൻ ക്രിക്കറ്റ് ടീമിനെ പ്രധാനമന്ത്രി നരേന്ദ്ര മോദി അഭിനന്ദിച്ചു. എല്ലാവരും സംഭാവന നൽകിയ ഒരു മികച്ച ടീം പ്രയത്നമായിരുന്നു ഇതെന്ന് പ്രധാനമന്ത്രി പറഞ്ഞു. കളിക്കളത്തിൽ ഇന്ത്യൻ ക്രിക്കറ്റ് ടീമിൻ്റെ സമർപ്പണവും കഴിവും മാതൃകാപരമാണെന്നും അദ്ദേഹം പറഞ്ഞു. ആഭ്യന്തര മന്ത്രി അമിത് ഷായും ഇന്ത്യൻ ക്രിക്കറ്റ് ടീമിനെ അഭിനന്ദിച്ചു. ക്രിക്കറ്റ് താരം വിരാട് കോഹ്‌ലിയെ അഭിനന്ദിച്ചുകൊണ്ട്, മിസ്റ്റർ കോഹ്‌ലിയുടെ മികച്ച പ്രകടനമാണ് മഹത്വത്തിലേക്ക് നയിച്ചതെന്ന് ഷാ പറഞ്ഞു. 2023ലെ ലോകകപ്പ് വിജയത്തിലേക്കുള്ള പാതയിൽ കോഹ്‌ലിക്കൊപ്പം രാജ്യം നിൽക്കുകയാണെന്നും അദ്ദേഹം കൂട്ടിച്ചേർത്തു. ധർമ്മശാലയിലെ എച്ച്പിസിഎ സ്റ്റേഡിയത്തിൽ നടന്ന പുരുഷ ക്രിക്കറ്റ് ലോകകപ്പ് മത്സരത്തിൽ ഇന്ത്യ ന്യൂസിലൻഡിനെ നാല് വിക്കറ്റിനാണ് പരാജയപ്പെടുത്തിയത് . ന്യൂസിലൻഡ് ഉയർത്തിയ 273 റൺസ് വിജയലക്ഷ്യം ഇന്ത്യ 48 ഓവറിൽ ആറ് വിക്കറ്റ് നഷ്ടത്തിൽ മറികടന്നു. 104 പന്തിൽ 95 റൺസാണ് വിരാട് കോഹ്‌ലി നേടിയത്.നേരത്തെ, ബാറ്റിംഗിനിറങ്ങിയ ന്യൂസിലൻഡ് നിശ്ചിത 50 ഓവറിൽ 273 റൺസിന് എല്ലാവരും പുറത്തായി. ഇന്ത്യക്കായി മുഹമ്മദ് ഷമി 54 റൺസ് വഴങ്ങി 5 വിക്കറ്റ് വീഴ്ത്തി. ഈ വിജയത്തോടെ തുടർച്ചയായ അഞ്ചാം ജയവുമായി ഇന്ത്യ 10 പോയിന്റുമായി പട്ടികയിൽ ഒന്നാം സ്ഥാനത്തെത്തി. നാല് ജയവും ഒരു തോൽവിയുമായി ന്യൂസിലൻഡ് ഇപ്പോൾ രണ്ടാം സ്ഥാനത്താണ്.