പുതിയ പാർലമെൻറ് കെട്ടിടത്തിൽ ഇരുസഭകളുടെയും നടപടികൾ നാളെ ആരംഭിക്കുമെന്ന് പ്രധാനമന്ത്രി നരേന്ദ്രമോദി

നാളെ മുതൽ പാർലമെന്റിന്റെ ഇരുസഭകളും പുതിയ കെട്ടിടങ്ങളിലേക്ക് മാറ്റുമെന്നും നടപടികൾ ആരംഭിക്കുമെന്നും പ്രധാനമന്ത്രി നരേന്ദ്രമോദി. പാർലമെന്റിൻ്റെ പ്രത്യേക സമ്മേളനത്തിൻ്റെ രണ്ടാം ദിവസം, പുതിയ കെട്ടിടത്തിൽ ലോക്‌സഭ 1.15 നും രാജ്യസഭ 2.15 നും യോഗം ചേരും.ലോക്‌സഭയിലെയും രാജ്യസഭയിലെയും എല്ലാ അംഗങ്ങളും സംയുക്ത ഗ്രൂപ്പ് ഫോട്ടോ എടുക്കുന്നതിനായി രാവിലെ പാർലമെന്റ് ഹൗസിൻ്റെ സെൻട്രൽ ഹാളിൽ ഒത്തുകൂടും. തുടർന്ന്, ഇന്ത്യൻ പാർലമെന്റിന്റെ സമ്പന്നമായ പൈതൃകത്തെ അനുസ്മരിക്കുന്ന ചടങ്ങും 2047-ഓടെ ഭാരതത്തെ വികസിത രാഷ്ട്രമാക്കാനുള്ള ദൃഢനിശ്ചയവും നടക്കും.ഞങ്ങൾ പുതിയ കെട്ടിടത്തിലേക്ക് മാറുകയാണെങ്കിലും ഇന്ത്യൻ ജനാധിപത്യത്തിന്റെ യാത്രയുടെ സുവർണ അധ്യായമായതിനാൽ പഴയ കെട്ടിടം വരും തലമുറയെ പ്രചോദിപ്പിക്കുമെന്നും ഈ പാർലമെന്റ് മന്ദിരത്തിന്റെ 75 വർഷത്തെ ചരിത്രത്തിൽ പുതിയ ഇന്ത്യയുടെ സൃഷ്ടിയുമായി ബന്ധപ്പെട്ട എണ്ണമറ്റ സംഭവങ്ങൾക്ക് രാജ്യം സാക്ഷ്യം വഹിച്ചിട്ടുണ്ടെന്നും പ്രധാനമന്ത്രി പറഞ്ഞു. എല്ലാ അംഗങ്ങളും പുതിയ പ്രതീക്ഷയോടെയാണ് പുതിയ പാർലമെന്റ് ഹൗസിലേക്ക് പ്രവേശിക്കുകയെന്ന് ലോക്‌സഭാ സ്പീക്കർ ഓം ബിർള പ്രത്യാശ പ്രകടിപ്പിച്ചു. പുതിയ കെട്ടിടത്തിൽ ഇന്ത്യയുടെ ജനാധിപത്യം പുതിയ ഉയരങ്ങളിലെത്തുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.

ഈ വർഷം മേയിലാണ് പ്രധാനമന്ത്രി നരേന്ദ്രമോദി പുതിയ പാർലമെന്റ് മന്ദിരം രാജ്യത്തിന് സമർപ്പിച്ചത്. 65,000 ചതുരശ്ര മീറ്ററിൽ പരന്നുകിടക്കുന്ന പുതിയ പാർലമെന്റ് മന്ദിരത്തിൻ്റെ മുഴുവൻ പരിസരവും, ആധുനിക ഇന്ത്യയെ നിർവചിക്കുന്ന വൈവിധ്യത്തെയും ചടുലതയെയും മാനിച്ചുകൊണ്ടുള്ള പ്രാദേശിക കലകൾ, കരകൗശലങ്ങൾ, സാംസ്കാരിക രൂപങ്ങൾ എന്നിവ സമന്വയിപ്പിച്ചതാണ്. മൂന്നിരട്ടിയായി വികസിച്ച ലോക്‌സഭാ ഹാൾ 888 സീറ്റുകൾക്ക് വിശാലമായ ഇടം നൽകുന്നു. ലോക്‌സഭാ ഹാളിനോട് ചേർന്നാണ് രാജ്യസഭാ ഹാൾ, അതിൽ 384 പേർക്ക് ഇരിക്കാം.